Elkarrekin hazten, elkarrekin jolasten.

Atalak: Aitatasuna, Amatasuna, Atxikimendua

Guraso izatea erabaki genuenean hasi ginen gure hezteko eraren inguruko erabakiak hartzen. Berehala topatu genuen guretzat egokiena zen bidea. Haurraren erritmoa errespetatu eta ahalik eta erarik kontzienteenean urratsak ematen joatea iruditu zitzaigun guretzat egokiena. Ez genuen, guk haur bat izateagatik, aiton-amonak, izeba-osabak edo beste inor konprometitu nahi, eta ahal genuen neurrian haurraren ardura guztia guregain hartzea erabaki genuen.

Atxikimendua, haurraren garapen globalak eta adimen emozionalari erreparatu eta berarekin ikasten joateko hautua egin genuen. Orain, 18 hilabeteko haurra dugu, eta zoriontsu gara hiruok. Haurraren urrats guztiak bizitzen ari gara, elkarrekin hazten ari gara, elkarrekin ikasten. Ez dugu haurreskolara eramaten, oso gutxitan uzten dugu beste norbaiten ardurapean eta oso pozik gaude.

Gure erabakia hori izan da. Ez ditugu besteen erabakiak epaitzen, bakoitzak, bere egoeraren arabera egokiena egiten duela uste dugulako. Guk gure bidea egiten dugun bezalaxe, familia bakoitzak, berea egin behar du.

Eta bide horretan, izugarri ikasten ari gara. Gure bizitza izugarri aldatu da. Hoberako. Haurrarekin gozatzen ari gara, berarekin igarotzen dugu denbora asko, lurrean eseri eta jolasean orduak ematen ditugu, barre egiten dugu, algarak… Ez, ez gara dirudun bihurtuko, lana ere, haurraren arabera antolatu dugulako, bizitzeko justua dugu, baina oso aberats sentitzen gara.

Bide horretan, eta gu bezalaxe, familia asko daudela dakigunez, Iruran astean behin, elkarrekin hazi eta elkarrekin jolasteko tartea hartu dugu. Eta gaur, sorpresa izan dugu, Donostiatik etorritako familia bat ere bertaratu da eta. Azken batean, familia geroz eta gehiago bagara ere, haurrak haur eskolan edo eskoletan ez ditugunok, zoritxarrez, elkartzeko espazio eta aukera gutxi izaten ditugu eta. OSTEGUN goizetan biltzen gara, haurrekin jolasteko, elkar ezagutzeko eta tarte atsegin bat partekatzeko, guztiz irekia da eta adin desberdinetako haurrak eta gurasoak elkartzen gara. Bazatoz?