Ni gehiago!

Atalak: Aitatasuna, Amatasuna, Emozioak

Asko gozatzen dut haurren arteko elkarrizketak entzuten, guraso-haur elkarrizketak entzuten… eta bada azken aldian belarrian PIIIII handi bat egiten didan atzizki bat… -AGO! Ni handiAGOa naiz, nik jostailu gehiAGO dauzkat, nire askaria goxoAGOa da, bera txintxoAGOa da… eta hau bakarrik datorkit burura: HAGO ISILIK!

Nork ezartzen dizkie haurrei -ago horiek? Nork bere izaera zehazteko etiketak? Nork du haurrak elkarrekin etengabe erkatzen aritzeko beharra? Nork horrenbesteko ziurtasun falta? Nork sustatzen du konpetitibitate hori?

Askotan, haurren bidez gure gabeziak bete, ezkutatu edo erakutsi nahi izaten ditugula pentsatzen dut. Gure haurrei, eta okerragoa dena, ingurukoei, etiketak ezartzen dizkiegu izan behar dutena zehaztuz, benetan direnari askotan erreparatu gabe. Benetan al da garrantzitsuagoa haur bat bestea baina altuAGOa izatea? Edo handiAGOa? Edo jostailu berriAGOa izatea? Edo azkarrAGOa? Edo traketsAGOa? Edo polita, itsusia, ona, txarra…

Zaila dirudien arren, askoz errazagoa da haurrari etiketa horiek ez jartzea, batez ere, berak berezko ezaugarritzat har ez ditzan. Esan haur bati mila aldiz lotsatia dela, eta lotsatia izango da. Esan beldurtia dela, gaiztoa dela… Esan, baina gero, ez eskatu desberdina izan dadin.

Zoaz parkera, eta aritu zure haurrak eta besteek berdin eta desberdin egiten dutenari begira nahi baduzu, kezka zaitezke edo harro egon… baina ez aipatu haurrei. Ez sortu beraien artean konpetitibitatea. Saia zaitez, bakoitzaren ezaugarriak errespetatzen eta besteak baina hobea ez dela adierazten, bakoitzak bere izaera duela eta hori garrantzitsua dela adierazten… eta jasoko duzu, izaera desberdinez beteriko lagun talde aberatsa, non berdin izango duen zein den altuagoa, baxuagoa, azkarragoa edo traketsagoa. Bakoitzaren -ago-ak, berezi egingo baitu.

Eta bide batez, saia zaitez, zu zeu ere, albokoarekin ez erkatzen. Autoestimuan eta segurtasunean asko irabaziko duzu!