Jolasa baina askoz gehiago

Atalak: Aitatasuna, Amatasuna, Atxikimendua

Jolasa da mundua ezagutzeko eta munduko arauak ezagutzeko modu errespetuzko eta eraginkorrenetako bat. Jolasa da haurrek behar-beharrezkoa dutena garapen egokia egon dadin… Jolasa, helduok gehiagotan egitea komeni zaigun ekintza.

Itzali pantailak (tira, itxaron sarrera hau  irakurtzeaz amaitu arte 😉 ) eta kendu zapatak, arropa erosoa jantzi eta eseri lurrean. Noiz egin zenuen azkenekoz?

Jolas manipulatiboaren bidez askoz errazago ulertuko ditugu kontzeptu konplexuak, plazeraren bidez eskuratuko ditugu eta abstraktutik ukigarriak diren kontzeptuetara egingo dugu salto.

Jolasa plazera da gainera eta tresna egokiak eskura baditugu, ia amaiezina.

Jostailuen munduak ez nau bereziki kezkatu haurrak jolasten gertutik ikusi ditudan arte. Ikusi eta ikasi…

Eta zer ikasi dudan? Izugarri! Baina oinarri oinarrian bi gauza:

– Ez eteten. Haurrak jolasean daudenean erabat kontzentratuta daude eta nahikoa da hitz bat jolasa amaitzeko. Ez bada benetan oso garrantzitsua une horretan etetea, itxaron, pazientzia da landu behar dugun gakoetako bat.

– Jostailu egokiak. Helburu bakarreko jostailuek ez dute arrakastarik epe ertain-luzera. Irudimenaren bidez milioika aukera ematen dutenek aldiz berdin balio dute hilabete gutxi izan edo ia 30 urte izan tarte atseginak igarotzeko.

Egurraren iraultza garrantzitsua. jostailu bat erosi behar baduzu, bila ezazu egurrezkoa eta tinte toxikorik gabea. Zer ote du egurrak jolasa atsegin eta luzeago bihurtzeko? Eta oso garrantzitsua gutxi eta txukun, haurrek ikusi eta har ditzaketen tokian.

Gai honekin kezkatuta orain aste batzuk Alupe-rekin jarri nintzen harremanetan eta etxean tupper toy bat izan genuen. Jostailu desberdinen inguruko azalpen erraz eta ulergarriak eta ondoren, guztiak ukitu eta probatzeko aukera, haurrekin. Bertan gauza dexentez maitemindu ginen eta gutxi batzuk etxerako hartu genituen. Horren ondoren, enegarrenez etxea hankaz gora jarri eta jostailu garbiketa egin, erabili gabe luzaroan egon direnak kaxa batean beste etxe baterantz doaz eta berriak toki egokietan, txukun eta bistara jarri ditugu jada.

Hauek behin eta berriz erabiltzen ari garen jostailuak, 4 urteko haurra eta 6 hilabeteko txikitxoarekin.

Aspalditik azoka, denda eta halakoetan ikusi eta begirada erakartzen zidan zuhaitz hau zoragarria da. Soinu oso polita egiten du eta uste baina askoz denbora gehiagoz aritzen da seme zaharrena jolasean, abiadura desberdinak, kanika kopuru desberdinarekin… eta txikienak adi-adi entzuten du, liluraturik. Gainera, estetikoki polita da… egongelan biziko da hemendik aurrera.

Eta eraikuntzarako material zoragarriak, matematikatik asko duena eta istorio zoragarriak asmatzera daramana.

Zoragarria da jolasean ikustea… eta sekretu bat kontatzen uzten badidazue, neurri desberdinetako koloretako piezak jasotzeak ni, nire 29 urteekin, asko erlaxatzen nau… eta nik ere egiten ditut nire eraikuntzak.

Orain etxeko txokoak apur bat aldatu badira ere, egokitze konstantean gabiltza eta gune berriak ditugu egongelan zein komunean, hemen ikus dezakezue autonomia sustatzeko eta gauza bakoitzak bere tokia izateko gure etxeko sekretuak.

Eta plazera noski, hezkuntzarekin konpromiso izugarria duten irakasleak zein beste familia batzuk gurekin egun hartan izatea, jolasaz hitz egiteko espazioak izatea.

Bide batez… norbaitek gabonetan opari bat egin nahi badigu… musika nota guztiak dituzten kanpaiak asko gustatu zitzaizkigun 🙂