“Euskal herritarrek tranpak egiterakoan dauzkaten lehentasunak” izeneko ikerketa argitaratu du urtero bezala EHUren Soziologia Fakultateak eta lehenbiziko aldiz, mus-partidak irabazteko egindako zerrikeriak ez dira herritarren gogokoenak. Osakidetzako oposizioak indartsu sartu dira sailkapenaren lehen posturaino, “errape publikotik zupatzen bizi nahi duen jende kopuru neurrigabeak” bultzatuta, ikerlarien arabera. Emaitza deigarrien artean beste joera bat ere nabarmendu dute: duela hamarkada bat hiru eguneko parrandak egiteko tranpak egiten zituztenek gaur egun mendi-maratoietan iazko marka hobetzeko egiten dituzte tranpak. Ikerlariek ezin izan dute argitu horretarako substantzia bera erabiltzen ote duten.