Diego Armando Maradona hil eta minutu gutxira, zientoka gizonek haren aldeko mezuak zabaldu zituzten sare sozialetan. “Nolabaiteko guda bat piztu zen, esaldi poetiko afrus eta ñoñoena nork idatziko”, azaldu digu Zelai Orlegi soziologoak: “Eduardo Galeano aipatzea oinarrizko baldintza zen eta, handik aurrera, imajinazioari hegan egiten uztea besterik ez zegoen, malkoa helburu. Baina, usteak erdia ustel, emakume* batzuek ispiluaren aurrean jartzeko eskatu eta gizonek* berehala aldatu dute erregistroz, ohiko ‘goool-penalti-ixilduhaiputakumea!!’ estilora itzuliz”. Maradonaz idazteko Eñaut Elorrietaren diskografia osoa errepasatu zuen txiolari ezagun batekin harremanetan jarri gara, eta Orlegik esandakoa berretsi digu: “Behin nire alde femeninoa aterako eta… limoi artean bizi den batek eguna izorratu behar, zer eta Gaztea Sariak bezalako ekitaldi iraultzaile batean esandako zerbaitengatik, ostia puta”.