Udako opor luzeen ondoren, Euskal Herriko zorriak aste honetan itzuli dira ikasgeletara. Iaz baino 18.289 zorri gehiago ibiliko dira aurten euskal umeen buruetan eta kurtso hasiera baliatu dute euren egoera salatzeko: “Ikas-komunitatearentzat funtsezkoak garen arren, erakunde publikoek marjinatu egiten gaituzte”, adierazi du Zorri Langileen Sindikatuak prentsara bidalitako ohar batean. “Etxe guztietara iristen gara, ez dago gure zerbitzuak jasotzen ez dituen ikastetxerik, baina hala ere existituko ez bagina bezala jokatzen dute. Noiz arte?”. Ikasturte berrirako aldarrikapenen artean, nagusia honakoa da: Eusko Jaurlaritzak, Nafarroako Gobernuak eta Euskal Elkargoak irakaskuntzako oposizioetan zorrientzako plazak sortzea. “Bestela, eragiten dugun azkura hirukoiztuko dugu”, adierazi du sindikatuak.