Filipe Bidarten aldartea

Atalak: (C)politika

Libro sentitzen naiz, ez dut batere presiorik sentitzen, baina baditut errespetatu beharreko baldintza batzuk. Hausten baditut hamabost urteko zigor finkoa arriskatzen dut. Nire buruarekin lehiatzen naiz debekua ez hausteko.

Filipe Bidart

Filipe Bidart baigorriarraren hitzak dira. Biterrin bizi da (Okzitanian) baldintzapeko askatasunean. Bere egungo bizimodua ezagutu ahalko duzu aste honetako Argian.

Tira, bere bizimoduari buruzko den-dena, nahita ere ezin izango genuke argitara eman, noski. Alta bada, hona Filipe Bidart-en izaeraren eta aldartearen lekukotasun zenbait:

Bidartarrak lau haurride dira: Betti, Filipe, Jojo eta Babi. Azkeneko hau orain urte batzuk zendu zen. Jojo izan ezik, beste hirurak presondegian egon dira denbora batez eta aldi berean.
Behinola juje batek, familiako hiru seme preso zeudela, hauxe esan omen zion Filiperi:

– Nire ustez, zure aita da arrastatu behar duguna.

Filiperen aita, Jean-Batiste Bidart da.Pasadizo horren garaian, ARGIAk elkarrizketatu zuen (1323. zenb / 1991-01-27 ). Elkarrizketaren titularrak honela zioen:

“Ez ditugu gure semeak jujatzen ahal, egin duten hautuaz”.

Aitaren esaldia gogorarazi diogu Filiperi. Hona bere gogoeta:

“Guk egin dugun hautua, guhaurek egin dugu. Zer nahi gisaz, gure hautua aita-amei inposatu diegu. Gure aita-amek hautu hori errespetatu eta bereganatu dute, eta hori baino gehiago ere, sostengatu gaituzte.

Ene aitaz zuzenki mintzatzeko, ene aitaren sostengu hurbila eta premiatsua izan da enetako, asko erakutsi dit, asko erakutsi digu. Garai batean hiru anaia ginen preso. Eta egia da, ene hautuarengatik pairatu duela berak ere, alta, beti burua zutik egon da. Sekulako maitasuna dut nire aitarentzat eta gizon bezala sekulako errespetua diot”.

Unea zirraragarria izan zen. Filipe Bidartek ironia ere badarabil bere adierazpenetan. “Jojo duzu presondegian izan ez den anaia bakarra. Irudiz bera da Bidart zintzoena” esan genion txantxetan.

Filiperen arrapostua:

– Zintzoena edo abilena!