Aste ekologikoa (II): Biocultura azoka, gaurtik aurrera BEC-en

Atalak: Agenda, Gaurkotasuna

Aurreko sarrera batean komentatu nuen bezala, asteburu osoan zehar Biocultura produktu ekologikoen eta zentzuzko kontsumoaren azoka izango da Barakaldoko BEC-en. Gaur goizeko 11.00etan ireki dira ateak eta igandeko 20.00etan itxi egingo dira. Sektore ezberdinak ordezkatzen dituzten 200 bat erakusmahai bisitatu daitezke, besteak beste, nekazaritza eta elikadura biologikoa, bioeraikuntza eta energia berriztagarriak edo artisautzazkoak.

Horietaz gain, hitzaldiak, tailerrak, bideo emanaldiak eta kontzertuak ere programatu dituzte hemen ikus dezakezuen egitarauaren barruan. Lehenengo ekintza, pixoihal ekologikoei buruzkoa, gaur (ostirala) izango da, 16.00etatik aurrera. Oso gai ezberdinak jorratuko dira hiru egun hauetan zehar, adibidez, brain gym ariketak, eskola-baratz ekologikoen txapelketa, edoskitzea, ekonekazalturismoa edo soinuterapia.

Sarrerak 4€ balio dute helduentzat eta 11 urtetik gorakoak doan sar daitezke. Haurrek, gainera, ekintza berezietan parte hartu dezakete. Zenbait beherapen ere badaude gazteentzat eta erretirodunentzat.

Beno, hau guztia azalduta, horrelako ekitaldien inguruan nahiko eszeptikoa naizela argitu behar dut, inguruan hautematen den dogmatismoa dela eta. Egia esan, ez dut arrazoi zehatzik, horregatik, tokia bisitatu arte ez dut baloraziorik egingo.

Bestaldetik, gogoratu bihar (larunbata) goizean Nekaraba nekazaritza ekologikoaren azoka ospatuko dela Gasteizko Foru enparantzan. Bertan, tokiko ekoizleek euren produktu ekologikoak jarriko dituzte salgai.