Iñaki de Juana eta ‘aurrera bolie’

Atalak: Politika

Iñaki de Juana preso ohiak azaroaren 11n aurkeztu beharko du Auzitegi Nazionalean eta hala egin ezean, Eloy Velasco epaileak atxiloketa agindua emango du. De Juanarekiko mendeku gosea esperpentoa noraino iritsi daitekeen azaleratzen ari da: oraingoan azaldu beharko dio epaileari ea zer esan nahi zuen Donostiako Alde Zaharrean egin zitzaion ongi etorrian irakurri zen idazkiaren Aurrera bolie esapidearekin.

Aurrera bolie Arrasate eta bere inguruetan esaten da eta Txomin Iturbe ETAko buruzagi ohiak egin zuen ezagun Euskal Herri osoan. Bere esanahia “eutsi goiari” esamoldearen parekoa da eta nik behintzat behin baino gehiagotan entzun izan dut “bota pinue!”-ren ondoan. Edo biak batera, “aurrera bolie eta bota pinue”. Biak ala biak kemen hitzak, oztoporen baten aurrean edo zerbait egiteko indarra eta animoa emateko erabiliak. Nekane San Miguel epaile arrasatearrak aurrera bolie hori berak nola ulertzen zuen azaldu zuen 2006ko abenduan ARGIAn idatzitako iritzi artikuluan.

Eta orain asmakizuna, adi irakurle, testu honetako azken paragrafoan egon bailiteke ustezko terrorismoaren apologia delitua (hitzez hitz eta idatzitako hizkuntzan): “Solo quiero recordar las palabras de un gran hombre y, por suerte, amigo de este pueblo: Aurrera bolie! Besterik gabe, berehala bertan, hor izango nauzuelako, ez adiorik, gero arte baizik! Gora gu eta gutarrak! Gora euskal errepresaliatu politikoak! Gora Euskadi askatuta!”.

Dramatikoa ez balitz, barre egitekoa litzateke, baina De Juanak 2006ko udazkenean hiru urteko espetxe zigorra jaso zuen 2004ko abenduan Gara egunkarian idatzitako bi iritzi artikulu hauengatik, El Escudo eta Gallizo. Mehatxu terrorista leporatuta, fiskalaren hasierako espetxe eskaera 96 urtekoa izan zen, epaiketaren unean 6 urtera jaitsi zuena eta azkenean hiru urteko zigorrean geratutakoa. ARGIAn erreportaje honekin azaldu genuen epaiketa hau. Ondoren, ETA eta Espainiako Gobernuaren negoziazio prozesuaren erdigunean, ia heriotzera eraman zuen gose grebari ekin zion De Juanak. The Times egunkariak erreportajea argitaratu zuen eta bertan ateratako argazkiak munduari bira eman zion.