Indarra Iruñeko kaleetan zehar

Atalak: Ekonomia, Gizartea, Politika

Normaltasuna osoa dela diote Lakua eta Nafarroako foru gobernutik. Baina ez, kaleetan ibili denak badaki hori gezurra dela. Ez zegoen normaltasunik Euskal Herriko kaleetan, lantegi ugari itxita eta pikete informatiboak hara eta hona grebarako deialdia eginez. Greba orokor erabat arrakastatsua ere ez da izan, argi dago, baina hori aldez aurretik ere ezaguna zen. Sindikatuen arabera jarraipen zabaleko greba izan da. Bai, zabalekoa zalantza barik, baina hori ere oso zehazgabea da. Maila oso desberdineko jarraipena izan du grebak eta egunaren bukaera aldera hobeto jakingo da non izan duen hedapen handia eta non ez horrenbeste. Baina egunak ezaugarriren bat izan badu, normaltasuna behintzat ez da hori izan.

Kazetari hau Iruñeko kaleetan ibili da goiz osoan zehar, eta goizean goizetik Alde Zaharrean ELAko 100 laguneko piketeak eta haien atzean zebilen polizia taldeak argi uzten zuten gaurkoa ez zela ohiko eguna. Goizaren erdi aldera hainbat sindikatutako piketeek bat egin dute 1000 pertsonako talde sendoa osatu arte. ELA eta LABeko bandera eta afixak ziren nagusi, baina EHNE, HIRU eta ESK-koak ere ikusten ziren. El Corte Inglesaren aurrean tentsioak gora egin du pixka bat, baina giro lasaia berehala nagusitu da.

CGTk ere Vinculo Plazan zeukan bete ekitaldia, 150en bat pertsona ziren. Sindikatu honetako buruzagi baten hitzak harrapatu ditut, ez ziren adierazpenak baina bai adierazgarriak, gaurko grebaren izaerari buruzkoak: “Piketeetan ibili gara goizean, baina ez dugu ezer itxiarazi, erabat informatiboak ziren, eta ni ez naiz ibili inoiz hala greba orokor batean. Aurreko beste grebetan dena ixten zen piketeak pasatu ahala”. Nirekin zegoen lagun bati esaten ari zitzaion hori eta ez diot galdetu ea zergatik ixten zuten beste batzuetan eta gaur ez, baina esandakoetatik sumatu dut aurrekoetan giro gogorragoaren ondoren dendak-eta ixtera behartuak sentitzen zirela eta gaur ez.  Greba egin egin behar zela zioen buruzagiak tinko, baina gaurkoa batez ere hurrengo greba orokor baterako urrats gisa baliatu behar zela azpimarratzen zuen.

Eguerdiko 12etan zen manifestazioa Gazteluko Plazan eta auzoetako manifestazio talde handiak batetik eta bestetik sartzen ziren jadanik borborka ari zen plazan. Jendea ez zegoen elkarren gainean, erabat trinkotuta, eta Plaza bete egin da. Gazteluko Plaza, Merindadeen Plaza, Nafarroa Beherea Kalea, Bakearen Plaza, Sarasate Pasealekua eta Gazteluko Plaza izan da ibilbidea. Sarasate pasealekura iritsi baino metro batzuk lehenago atera dira azken manifestariak Gazteluko Plazatik.

Jende ezaguna ikusten da han-hemenka, Landabeneko poligonoan ari den lagun bat ikusi dut manifestazioan eta hurbildu naiz. “Zer goizean noiz hasi zarete?” galdetu diot. “Goizeko seiak aldera gora eta behera ari ginen Landabenen, lantegi asko itxita ziren eta beste batzuk lanean geratu dira. Koadrila handia ginen baina ohi baino gutxiago, greba egin duen jende asko goizeko ordu txikietan etxean geratu da”.

“Peña eta elkarteetan ere jende asko zegoen” aipatu du ondoko batek. “Baina hori normala da, beti gertatzen da grebetan –erantzun dio gertukoak– jendea kalean dabil, baina ez da zabalik diren tabernetara sartzen eta goizean zehar atzera-aurrera jardun ondoren, norabait jo behar, ezta?”.

Beste ezagun bat ere hurbildu zait, bere lagun baten kontakizuna dakarkit: “Javierrekin egon nauk, Nafarroako Administrazioko Ogasunean egiten dik lan eta hamaika pertsonako euren lan taldetik bera bakarrik atera dela. Bera duk behin-behineko kontratatu bakarra, gainerakoak fijoak dituk. Areago, jefea jubilatzen dela-eta bihar afaria dutela. 35 euro menurako eta beste 25 oparitako. Berak jai hartu duela bihar”.

Azkenean iritsi da manifestazioa Gazteluko Plazara. 13.000-15.000 pertsona esan dute antolatzaileek, 4.500 gobernu ordezkaritzak. Ez dut kontaketa zehatzik egin, baina bukaeran Gazteluko Plazan lagun bati galdetu eta baietz gutxienez 7.000 izango zirela. Nik ere baietz esango nuke, baina kontaketa metodikoa egin barik gaitza da asmatzea. Jendetza da edozelako kasutan eta jendea pozarren ageri zen. Atera dira sindikatuetako buruak euren hitzaldiak egitera. Igor Arroyo nabarmendu da, LABeko Nafarroako idazkari nagusia. Hitzaldi gartsua egin du, eta txalo zaparradak jaso ditu. Azken hizlaria Mitxel Lakuntza izan da, Nafarroako ELAko koordinatzailea. Gazteak dira buruzagi biak, “eta bien arteko harremana oso ona da” xuxurlatu dit ELAko militante batek. Arratsaldeko manifestazioa Golem zinemetatik aterako da, 19:00etan.