Egunkariko kazetariak hil du sareko blogaria

Atalak: Hedabideak

Richard Horton polizia detektibea, NightJack blogaren egilea

Hiltzailea pistola barik doa, labanik ere ez, ezta makiltzarrik ere… Baina seguru egiten du aurrera, tinko, egunez, jendaurrean… Sartu da epaitegira eta ordu batzuen ondoren irribarre maltzurrez atera da, eskuak odolez garbi baina krimena gauzatua. Oraingoan ehiztaria bera da lurrean, odol orban barik, baina zerraldo. Hiltzaileak NightJack hil du.

The Times egunkari britainiar ospetsuak hil du NightJack blogari anonimoa. Nola? Bere anonimatoa hautsiz, blog arrakastatsu horren egilea Richard Horton detektibe polizia dela esanez. Eta Hortonek bloga itxi du. Blogari ezezagunak 60.000 bisita izaten ei zituen egunero eta puntako une batzuetan 500.000 sarrera ere lortzen zituen antza.

Ez dakit Hortonek The Times-ekin arazorik izana zuen edo ez, baina irakurri ditudan kontuengatik ez dirudi bederen. Kasua aztertu duten zenbait kazetarik paperezko prentsa eta blogintzaren arteko lehiaren testuinguruan kokatu dute. Auzian honako hau ebatsi da funtsean, ea legearen ikuspegitik blogariak anonimo izan daitezkeen ala ez. The Times-en ustez ez eta horrexegatik NightJack-i buruzko ikerketa egin, nor den argitu eta auzitegietara eraman du.

Polizi blogariak bere anonimotasuna babestea eskatu dio epaileari, baina ez, honek Richard Hortonek blog publikoa egiten duela eta, beraz, ez duela anonimotasunerako legezko eskubiderik. Eta honek eztabaida piztu du. Hona hiru iritzi: Enric Gonzalezek eta Perogrullo-k (Jose Cervera kazetaria) The Times-k oso zikin jokatu duela uste dute, bere salmentak babesteko, besterik gabe Horton blogari lanetan ari zelako… Periodismo global: la otra mirada-n, aldiz, logikotzat jotzen da epaiaren mamia, baina kazetariak egunkari britainiarraren jokaera ez dela etikoa uste du.