Rikardo Arregi versus Iñigo Iturrate

Atalak: Hedabideak, Politika

Lander Arbelaitz Ertzaintzak eraso baino segundu batzuk lehenago, ARGIAko agiria eskuan.

Gaur, Lander Arbelaitz ARGIAko kazetariak Rikardo Arregi Kazetaritza Sariaren aipamen berezia jaso du Donostiako Aske Gunean egindako lanagatik. Andoaingo Udalaren saria da, Eusko Jaurlaritzaren babes ekonomiko eta instituzional handia duena. Idurre Eskisabel epaimahaikideak eman ditu sariaren arrazoiak: “Minutuz minutu egindako lanarekin informazioarekiko konpromisoa erakutsi duelako, lan hori imajinazioz eta profesionaltasunez jorratzeagatik, agintarien kontroletik ihes egiten duen kazetaritza lantzeagatik, teknologia berrien erabilpenagatik…”.

Pozik entzun ditut argudioak, batez ere Arbelaitzek Donostian egindako lanaren aitortza direlako eta baita ere ekainaren 2an EAJko parlamentari Iñigo Iturratek Eusko Legebiltzarrean Arbelaitzen kazetari lana ukatu ondoren etorri direlako. Ikusi Iturratek orduan esandakoetako batzuk:

“Emozioa transmititu didazu, baina espekulazioz eta balorazioz betetako kontakizuna egin duzu, ez da objektiboa izan”. (Hala ere bigarren agerraldian, bost minutu geroago, Arbelaitzen erantzunaren ondoren zera gaineratu zuen, “ez diot kazetari bati objektibitaterik eskatzen, ez baita halakorik existitzen”).

“Ulertzen dut tentsioz bizi izan zenuela, baina ez dut ikusten [Ertzaintzaren aldetik] eredugarria izan ez zen ekintzarik. Batez ere ikusita une batetik aurrera erabaki zenuela kazetari izateari utzi eta Aske Gunearen parte izatea (…) baina kazetarien gunetik salto egiten duzun momentutik aurrera, erabaki horrek ekarritako ondorioak kazetari txartelaren atzean zuritu nahia ez da bidezkoa”. (Rikardo Arregi Sarietako epaimahaiak ez du horrela ulertu, baina gainera, ertzaintzaren tratu txarra kioskora igo aurretik jaso zuen, Arbelaitz ondo identifikatua zegoenean. Ikusi bideoa eta zeuk erabaki, irakurle, editatua den arren, oso argia da).

“Kazetari batek helarazi dit bideo hau eta editatu gabe dago, zuk aurkeztutako bideoak, aldiz, editatuta”. (Ez dakit zer esatekorik izango duten, esaterako, ETBko bideo editoreek, edo nola egingo dituzten haiek albiste eta erreportaje asko).

Bai, bere testuingurutik ateratako esaldiak dira, baina irakurleak guztiaren berri izan nahi badu, hemen ditu Iturratek eta Arbelaitzek Legebiltzarrean esanak.

Eta hara kontrastea, Ertzaintzaren eskutik jasotako tratu txarraren ondoren, Arbelaitzek  Segurtasun Sailaren inongo barkamen eskaerarik jaso ez badu ere, gaur Hezkunta, Hizkuntza Politika eta Kultura sailburu Cristina Uriarteren zorionak jaso ditu bere lanagatik.

Zorionak Lander! Zorionak gainerako saritu guztiei!