Eskolta bitxia

Atalak: Gizartea, Nazioartea, Sailkatugabeak

Euskal Herria eta Irlanda, Europan dira biak eta ez oso urruti gainera. Ez gara oso kultura desberdinekoak, baina bizileku bakoitzak baditu bere ohitura eta bitxikeriak. Irlandan ere badira ezustean harrapatzen zaituzten kontu ugari. Esate baterako: 

Lanean zaude etxean, begiratzen duzu leihotik eta Creggan Roadetik behera dator ehorztetxeko autoa eta segizio guztia atzean, 50-100 bat pertsona… eta auto beltza, berdez eta beltzez uniformatutako sei pertsonez eskoltatua doa. Armarik ez da, baina eskolta militarra dirudi. Katedralera doaz, antza. Zapatak eta zira jantzi ziztu bizian –euria da– eta bazoaz zu ere zer den ikustera, smartfhonoa eskuan. Esango dizute zerbait argazkiak atera edo filmatzen badituzu? Zure aurrean dena goitik behera filmatzen ari den neskak zalantzak uxatzen dizkizu. Eta bota dituzu, zuk ere, zenbait klik, une gaitz horretan enbarazu gehiegi egin gura barik.

Eta gero erakutsi dizkiozu argazkiak Derryko lagun bati, galdera andanaz lagunduta: Pertsona ezagunen bat hil zen atzo? Normala da uniformeena eta eskoltarena? Nortzuk dira? “Bai, familiak eragozpenik jartzen ez badu, IRAko militante ohiak horrela laguntzen dituzte, ohikoa da . Eta beste erakunde armatu batzuetakoak ere bai. Hauek –bandera urdina eta izar zuriengatik dio berak– IRSPkoak dira (Irlandako Alderdi Errepublikar Sozialista). Hildakoa agian INLAko (aurrekoaren gertuko erakunde armatua zena) norbait izango zen”. Lehen tiro eta guzti egiten ei zuten hiletetan.

Hildakoaren autoa Derryko katedraleko sarreran.