Gasifikadoraren aurka Derryn

Atalak: Sailkatugabeak

Derry, 2013ko urria. Aita MacDonaldsera, MacDonaldsera, MacDonaldsera… leloa mailua da buruan. Santi Leonek dioen gisan, nik ere ez diet halakorik erakutsi alabei, gehiago kontrakoa, baina gehiegirik ere ez, badaezpada. Ados, zure egunean MacDonaldsera. Esan eta egin. Dastatu barik, nekez arbuia liteke, ez behintzat aginduz.

Tira, gutxienez balio izan zuen alaba nagusiak esateko bera ez zela MacDonaldsera itzuliko. Eta gainera, bukaerako argazkia, mahaiaren argazkia, ikusgarria izan zen (eskuinean duzue). Badakit hala izaten dela, baina mamua erraietatik ikusteak zirrara ematen du. Egingo dut dagokidan penitentzia. Muturretako bat hori zen.

Beste muturra hurrengo egunean Derryko zentroko paretako collageak luzatakoa zen: Zero Waste. Eta poza eman zidan, “e, hemen ere badira!”. Izango dute lan, pentsatu nuen, hau “erabili eta bota” horren erresuma da eta take away kultura horrekin, bada zaborra bazterretan.

Derry, 2013ko azaroa bukaera. Etxeko ateak ez du txirrinik eta ateak postarako duen zirrikituaren xafla entzun da, klap! Bi paper bota dituzte: batean, Zero waste North West irakurri dut, eta bestean, No to gasification. A coll to Action. Eta dei bat Ipar Irlandako ipar-mendebaldeko zazpi eskualderako eraiki nahi duten gasifikadoraz informazio emango duen bilerara. Auzoan da eta bagoaz. 30 pertsona, helduak denak, ez dago 40 urtetik beherako inor. Tartean da auzoan bizi den Ipar Irlandako Gobernu Autonomoko Ingurumen sailburua, Mark H Durkan(SDLP). Egin dizkioten galderak erantzun ditu adeitsu eta alde egiteko altxatu da, baina aurretik, bere presentzia eskertu ondoren, aldameneko bizardunak Paul Connett-en The zero waste solution liburua oparitu dio. Beste batek argazkia egin die biei. Gaur joan naiz haien webgunera ea argazkia ba ote zegoen, baina oraindik ez dute jarri. Informazioa, zer egin daitekeen, nola antolatzen ari diren, zer den zero zabor… Bilera bizia da eta gustuko dituzten parte hartzeei txalo egiten diete.

90eko hamarkadaren hasieran Derryko erdigunean bertan eraiki nahi zuten erraustegia geldiaraztea lortu zen. Orain gasifikadoraren unea da: 600 milioi euroko proiektua –batzuek 1000 milioitik gertu egon daitekeela diote–, zaborrekin energia sortzeari buruzkoak, gasifikazioa errausketa mota bat dela, zero zabor politikei ekin beharra, beste leku batzuetako adibideak, urtero 120.000 tona zabor energia berriztagarria bihurtzearen kontuak… Zein ezaguna egiten zaigun musika hura!  Entzutera joan gara eta hala egin dugu, baina ezin izan diogu tentaldiari eutsi eta bukaeran guk ere zerbait esan dugu: “Gabon, Euskal Herritik gatoz eta gauza bakarra esan nahi dizuegu. Hango lurralde batean, Gipuzkoan, azken bospasei urteetan eztabaida eta gatazka  handia egon da eraiki nahi zen erraustegi bat zela eta. Azkenik, duela bi aste iragarri zen ez dela egingo. Animo, beraz! Jendeak txalo egin du. Hunkituta eta pozik, etxerako bidea hartu dugu.