Politikari, dimititu demontre!

Atalak: Politika

Roberto Jimenezek esan du berez martxoaren hasieran dimititu zuela, baina hauteskundeetan alderdia ez kaltetzeko ez zuela orduan publiko egin. (Arg: EITB).

Ez naiz ni izango politikari guztiak berdinak direla dioten horietakoa. Lagun eta ezagunen artean ere behin baino gehiagotan borrokatzen dut diskurtso hori, sare sozialetan hain zabaldua dagoena.

Boterea herritarren artean behin eta berriz txertatzen saiatzen den ikusmoldea da: politika kaka-zaharra da, politikari guztiak berdinak dira… horrela ez du politikan parte hartuko eta ez da boterea zalantzan jarriko. Eta herritar asko eta askok egiten dio kosk amuari, ez arrazoi barik gainera.

Beraz, ez dira berdinak, baina politikari guztien artean bada oso sustraitua dagoen jarrera bera: ez dimititzea. Eta hori alderdi guzti-guztietako kargu eta zuzendaritzetan oso txertatua dago, haien artean honetan ere desberdintasunak egon arren. Hauteskundeen emaitzen ondoren dimititu berri dute PSOEko Alfredo Perez Rubalcabak eta Roberto Jimenezek. Azken honek jakinarazi zuen gainera, berez, martxo hasieran dimititu zuela, Yolanda Barcina Gobernuan mantentzea agindu ziotenean. Eta horrekin gauzak konpondu beharrean, okerreratzen dituelakoan nago, baina gai interesgarria jarri du mahai gainean: zer da lehenengo obedientzia edo norberaren duintasuna? Diziplina edo askatasuna? Alderdi batean dabilenak badaki lotua dagoela, baina noraino? Zein sinesgarritasuna izan dezake herritarren aurrean Nafarren lehendakari eta gidari izan nahi zuen Jimenezek –hori lortuz gero hor izango dituen presioekin–   bere alderdiaren presioari eusteko gai ez bada? Hutsala. Hala bukatu du.