Oraingoz

Atalak: Nazioartea, Politika

Ezkorriarren %55,4k ezetz esan dio independentziari. (Western eye).

Bere lehen agerraldian Alex Salmonden aurpegiak dena esaten zuen: 55,4k ezetz eta 44,6k baietz. Eskoziarrek Erresuma Batuan geratzea erabaki dute eta pentsatu baino tarte handiagoarekin gainera.

Salmonden antzera geratu gara ohetik jaiki ahala baiezkoaren ezustekoarekin amestu dugun guztiak, eskoziar, katalan, euskal herritar… independentistak. Iragarpena ezetza zen eta espero arren, ezin ukatu lehen minutuetako zartakoa. Bihotzak asko agintzen du.

Baina Salmondek “oraingoz” esan du, eta pilotaren bigarren bote horri heldu behar orain etorkizunerako. Egia esan, ederra izan da Eskoziako ikasgaia. Nola liteke, galdu eta, hala ere, ederra izan dela? Ezin bestela izan hamarkada askotan erabakitzearekin amestu duten herri txikietako independentistentzat. Autodeterminazioaren pankarta eta leloak askoz ugariagoak izan dira euskal kale eta hormetan independentzia berarenak baino. Ba tori, hau da erabakitzea: 55-45.

Gaurko porrota, dena den, hauspo bilakatuko da datozen egun eta urteetarako. Quebec moduan. Eskoziak independentzia galdu du eta autonomia gehiago irabaziko du. Katalunian bultzada berri bat galdu da eta argudio sendo bat irabazi: “Espainiaren batasunaren aldekoek irabaz dezakezue”. Euskal Herrian ere animoak bildu behar, herritarrek hala nahi balute, erabaki eta galdu ahal izateko aukera irabazteko.

Gazia: bozketa bat galdu da. Gozoa: oraingoz.