Generalitateak eutsi: duintasun demokratikoa jokoan

Atalak: Nazioartea, Politika

Francesc Homs Generalitateko eledunak A9ko deialdiari eutsi egingo zaiola jakinarazi du.

Espainiako Konstituzio Auzitegiak ontzat eman du PPren Gobernuaren inpugnazio eskaera eta bertan behera utzi du Generalitateak deitutako bigarren kontsulta, hau herritarren partehartze prozesu gisa antolatua bazegoen ere. Horrexegatik, hain zuzen, Generalitateak ez zuen lege dekreturik garatu bozketa ekitaldia antolatzeko. Konstituzio Auzitegiaren ustez, hala ere, funtzionarioei bidalitako gutunak, A9rako eratutako webguneak edota partehartzea bultzatzeko Generalitateak egindako publizitate informatiboak dekretu baten eragin berdina dute.

“Bada duintasun osagai bat honetan guztian. Gobernuak umiliazioa nahi du. Generalitateak kontsulta ezin duela egin onartu ondoren, orain umiliatu egiten du eta herriari isil dadila eskatzen dio. Eta herritarrek esango dute, baina zergatik isildu behar dugu?”. Javier Perez Royo Espainiako konstituzio zuzenbideko katedratiko ezagunaren hitzak dira, Konstituzio Auzitegiaren erabakiaren aurretik TV3ko elkarrizketa batean esandakoak, eta galdera hor dago. Zergatik isildu behar dira herritar katalanak?

Eta ez dakigu zer gertatuko den datorren igandean, baina Generalitateak eutsi egin dio deialdiari eta herritar guztiak partehartzera eta adierazpen askatasuna defenditzera deitu ditu. Beraz, zer gertatuko den ez dakigu, baina badakigu katalan soberanistak eta ez direla isilduko, botoarekin, kalean, hauteskundeak aurreratuz, dena batera eginez eta gehiago ere bai akaso, baina isilik ez. Hau jadanik ez da bakarrik prozesu soberanista, Madrilek  prozesu demokratikoa ere bihurtu du. Salvador Cot Nacio Digital agerkariko zuzendariak idatzi berri duen legez, “igandean ikusiko da Katalunian nork agintzen duen”.

ANCko lehendakari Carme Forcadelek ere argi utzi zuen Espainiako Gobernuaren inpugnazioaren berri jakin zuenean: “Duintasun demokratikoagatik bozkatzera joan beharra dugu eta gure adierazpen askatasuna defenditzeko, argi dakigulako honek ez duela balore juridikorik eta ez dela loteslea. Baina balore politiko garrantzitsua du”.

Eta Espainiako Gobernuak eta Konstituzio Auzitegiak balore hori bikoiztu dute.