Gauzak aldatu dira, edo ez?

Atalak: Politika

PSEren eta EAJren zuzendaritzek egindako bilera bat. (Arg.: EAJ)

Bai, zenbakiak aldatzen direnean, ezer ez da berdin. EAJk 28 eserleku izango ditu Eusko Legebiltzarrean eta EH Bilduk 18. 75 legebiltzarkide dira eta gehiengo osorako 38 behar dira, EAJk orain ez dituenak. Kanpainan zehar aurreikusitako eszenatokietako batera iritsi gara, EAJk ez du gehiengo osorik ez PSErekin ez EAJrekin. Gerri malgutasunean artistak dira jeltzaleak, eta mugimendu oso txikiekin dena eskura izan dute aste osoan.

Orain panorama zertxobait konplikatu zaie, eta batek daki, hainbat unetan agian asko. Hori ikusi egin behar. Kanpainan ikuspegi sozialaren aldeko hautu argia egin dute EH Bilduk, Elkarrekin Podemosek eta PSEk. Harresi soziala eraikitzeko aukera euren esku dago. Baina oraingo legealdian ere izan dute aukerarik eta PSEk jeltzaleen aldeko hautua egin du, Etxebizitza legearen salbuespen bakarretakoarekin.

Logikoena litzateke PSEk EAJ sostengatzea berriz ere, azken finean hamarkadatan egin dituzten politiketan ez da ia desberdintasunik. Gainera, hala da diputazioetan eta beste makinatxo bat udaletan ere. Baina, gerta liteke ere PSE ohartzea bide horretatik hilobira doala zuzenean, eta bestelako politikak egiten hastea. Sinesgarria? Ez oso, baina dena da posible. Esaterako, nork pentsa zezakeen Pedro Sanchezek alderdiko goardia zahar guztiari aurre egingo zionik?

Eserleku batek aukera berriak ireki ditu eta, besteak beste, EH Bilduri eta Elkarrekin Podemosi kanpainan erakutsi ez dituzten konplizitateak eraikitzeko aukera handitzen die. Kaleko mobilizazio sozial ugaritan ikusten dira sentsibilitate bietako herritarrak, instituzioetan ere gehiago nabaritzeko aukera hor dago.

Egoerak berdin balio du EAJrentzat eta EH Bildurentzat, lehiak lehia eta bakoitza bere lubakian, bada konplizitateak handitzeko aukerarik, bien borondatearekin herrigintzan oso urrats garrantzitsuak eman daitezke eta.