Su-etena: Iparraldekoen begirada Euskal Irratietan

Atalak: Politika, Sailkatugabeak

Atzo su-etenari buruzko mahai-inguru batean parte hartu nuen Gure Irratiak Uztaritzen (Lapurdi) duen egoitzan. Jojo Bidarten gidaritzapean, Battitta Larzabal, Mixel Bidegain eta hirurok ordu betez jardun genuen ETAren iragarpenak ekarri duen egoeraz eta aurrera begira zabal daitezkeen aukera berriez.

Iparraldean engaiamendu handiko militanteak dira nire mahaikideak, eta haien iritzietan ezker abertzaleko bi sentsibilitate nagusietan (Batasuna eta AB, hurrenez hurren) egon daitezkeen iritziak sumatu ditut. Biak ere pozik su-etenarekin, uzkurxeago ikusi nuen Larzabal; honen ustez, orain su-etenak denbora behar du, nazioarteko presioak Espainiako Gobernua ere negoziatzera behar dezan. Negoziazio kontuetan Bidegainek argi du: bukatu dira negoziazio politikorako garaiak, Espainiako Gobernua ez da joko horretan sartuko eta, bere aburuz, horretarako aukera onena Lizarra-Garaikoa izan zen.

Denboraren kontu horretan, halaber, ñabardura garrantzitsua egin zuen Bidegainek, mahai gainean jarriz ETAko militanteak eta diruaren gaia. Hau da, klandestinitatean diren etakideak dirua behar dutela bizitzeko eta dirurik izan ezean osagai hori ere aurrerago arriskugarria izan daitekeela prozesu honentzat.  Behin su-etena atzeraezina zela ikusita, Ipar Irlandako kasuan Erresuma Batuko gobernuak IRA-ri emandako dirutzaz aritu zen Bidegain.

Nire parte-hartzearen zati handiena, ARGIAko 2243 zenbakian su-etena aztertzeko analisian idatzitakoetan oinarritu zen. ETAren iragarpenaren ondoren, Espainiako Estatuak emandako urrats okerrak –Adierazi EHren manifestazio debekua eta astearteko atxiloketak– ere baloratu genituen, baina hemen laburtu baino, interesa duenak jo dezala irratsaiora eta entzun dezala, osorik edo zatika. Behean helbidea:

http://euskalirratiak.info/eta-ren-du-etena.html