“Beste trenbide plataforma bat sortzea burugabekeria da”

Atalak: AHTren aktualitatea

Nafarroan mugikortasunaren inguruan, AHTren kontra eta tren sozialaren alde lanean diharduten eragile sozialek hausnarketa zabalago bat eskatu dute.

Erriberako Tren sozialaren aldeko eta AHTren kontrako plataformak, AHT Gelditu Elkarlana koordinadorak, Sustrai Erakuntzak eta Erdi Aldea Trenaren Alde elkarteak “sozialki eta ekologikoki bideragarria” izango den trenbide sarea sortzeko hausnarketa eskatu dute komunikatu batean.

Gogorarazi dute Nafarroako Parlamentuak mugikortasunaren inguruko ponentzia martxan jarri zela iaz, baina sei hilabete daramala bildu gabe eta “sintomatikotzat” jo dute egoera hori. Lehenbailehen biltzea eskatu dute “eztabaidarako eremu garrantzitsua eta beharrezkoa dela pentsatzen dugualko”.

Haien ustez beste trenbide plataforma bat egitea , Castejonetik iparralderantz, “burugabekeria” litzateke, ez duelako bideragarria izango dela dioen “azterlan bakar bat ere” atzean. Eragileok gogorarazi dute Nafarroako Erdialdeko eta Erriberako tren garraiobide “eskasari” kalte handia ekarri diola jadanik AHTk, lanpostuen galera eta geltokien itxierekin. Era berean, Etxebakoitzeko geltokia “burbuila espekulatzailea” elikatzeko aitzakia gisa ikusten dute.

“Ez da lehentasuna hitzarmen bat sinatzea, Nafarroatik eta Nafarroan zehaztu behar da zein eredu behar eta nahi dugun”, azaldu dute komunikatuaren sinatzaileek.