Konposta ARAZO bihurtu zeneko hura.

Atalak: Sailkatu gabea

Aspaldian konpostagilu zokoan egon ostean, hementxe gara bueltan. Gaurkoan ez dugu ordea konpostatze metodo berri bati buruz hitzegingo, gaurkoan IRITZIA eman nahi dugu, nahiz eta blog hau ez den iritzi blog bat.

Ez naiz alde batean edo bestean egotearen zale, baina gai bati buruz jakintza bat dudanean eta gai horri buruzko gauza “arraroak” entzuten ditudanean, defendatzea beste aukerarik ez daukat.

Aurreko astean Koldo Mitxelena liburutegian izan ziren konposta jardunaldietan egon nintzen, entzule moduan. Jende interesgarria ezagutu nuen eta asko ikasi nuen, bai konpostajeaz, bai legediaz eta bai Gipuzkoan konpostajean izango duen etorkizunaz.

Jardunaldiak bi atal nagusi izan zituen nere ustez: “konposta ideia ona da” eta “konposta arazoa da”.

“Arazoa” konpostagailuan

Laburbilduz, laster egingo den Epeleko konpostatze gune bikainaren bideo bat ikusi genuen, bikaina, polita, modernoa, aurrerakoia eta txundigarria. Pena da irudien gehiengoa digitala zela, espero dut, berandu baino lehen, pixel hoiek benetazkoak izatea. Ostean, adituen eskutik, konpostaren analisi eta legediaren arloak jorratu ziren, oso oso interesgarria guztia, bikaina!

Azken zatian ordea etorri zen danbatekoa. Aureko atalean, konpostaren birtude eta bikaintasunak erakutsi ostean, Epelen egingo den konpostajeren tenplua ikusi ostean eta konpostak-legedia harreman “arraroaz” informatu ostean, ondorio bakarra atera zen: Epelen lortuko den konposta arazo bat izango da, zeren ez baitauka irteera komertzialik. Naiz eta kalitate gorenekoa izango den eta legediaren barruan egongo den. Irteerarik ezean, pilatzea besterik ez da egongo eta hau arazo espazial bat izango da gure Gipuzkoa txikian.

Munduko logika unibertsalak dio, arazo bat datorrela baldin badakizu, erremedioa ipini behar zaiola etorri aurretik, eta hortxe topatu nuen koxka jardunaldi hauetan, “arazoaren” aurrean erremedio POSIBLE bakarra planteatu zela: konpostari balore komertziala ematea, hau da, konposta PUBLIKOA, gure enpresen lehiakide izatea.

Zail zait ulertzea, auzokonposta guneetan eskuetatik kentzen duten konpostak, ez duela irtenbiderik izango. Zaila da ere pentsatzea, edozer obra egiteko edo edozein hondakin kudeatzeko, inongo arazorik gabe inguruko lurraldeetara jotzen dela ikustea eta konpostarekin ordea, ezin dugula Gipuzkoatik irten, Gipuzkoan metatu beharko dugula gure konposta eta Gipuzkoa osoa konposta azpian itoko dela… hau da konpostarekin Gipuzkoarrok dugun “arazoa”. Zaila bai, ulertzea.

Datu xume bat. Konpostagailuen errendimentua %10 inguru da. Hau da, 100 kilo hondakin organiko konpostagailuan bota ezkero, 10 kilo konpost lortu ahal da. Alderantziz pentsatuta: 10 kilo konpost badugu, 100 kilo hondakin organiko kudeatu ditugulako da. Hau horrela, tona bat konpost lortzen badugu, 10 tona hondakin organiko kudeatu ditugula esan nahi du. nere iritziz, konposta horrek jada funtzio bikaina egin du organikoaren kudeaketan.

Ez naiz inongo mikrofonodun aditua, ez naute jardunaldietara gonbidatzen eta ez naiz “Master Composter” bat. Nere egunerokoa, konpostagailu barruan burua sartu, beraren tenperatura neurtu, bertako fauna ikusi-ulertu eta konpostatzaileari egiten ari den lan bikainean aholkatzea da, askotan, konpostatzailea berak ni baino gehiago jakin arren.

Baina Epelen egingo den konpostze gune bikain hori ikusi eta bertatik sortuko den konposta arazo bat izango dela entzuteak, belarri atzean min egiten dit. Batez ere, gugandik gertu, eremu txikitu, kutsatu eta lehorrak ehunka daudenean.

Nahiago dut tona bat konpostekin arazoak izan, “arazo ez den” 100 tona hondakin organiko edukitzea baino.

Eta bide batez, hemen konposta beharra duten eremuak.

http://www.elmundo.es/ciencia/2016/06/17/5763b74222601d58488b45ab.html