Hizkuntzen Egituren Munduko Atlasa on-line

Atalak: Hizkuntzak

WALS delakoa, alegia The World Atlas of Language Structures liburu eta CD-ROM formatuan argitaratu zen 2005ean. Britainia Handiko Oxford University Press-ek orain on-line jarri du.

Data base ikaragarria da WALS, munduko 2.650 hizkuntzen egiturak aztertzeko informazioa biltzen duena. 40 hizkuntza aztertzaileren lanak daude bilduta data basean eta euskarari buruzko fonologia, lexiko eta gramatika ezaugarriak aurkituko ditugun bezalaxe daude eskura yukulta, bobangi eta ngandi hizkuntzei buruzko datuak ere. Bilaketak modu askotara egin daitezke: hizkuntzaren arabera, hizkuntza familiaren arabera, herrialdearen arabera edo munduko maparen gainean klik eginez. Datu-basea edonoren eskura dago jakina, on-line baitago. Alabaina, etekin handia atera diezaiokete hizkuntzalariek urruneko eta ezezagunak diren hizkuntzen egiturez jabetzeko aukera dutelako.

WALS altxor handia da, dudarik gabe. Dena dela, ez pentsa “dena” aurkituko duzuenik. Esate baterako probatu euskarari buruz informazioa bilatzen. Zerrenda arraroa aterako zaizue “basque” eskatuta: Basaburua and Imoz, Bidasoa Valley, Gernica, Hondarribia, Lekeitio, Northern high navarrese, Oñati, Roncalese, Sakana, Souletin, Zeberio. Herri eta bailara horietako euskararen egiturak aztertu dituztenen lanak eskuratu dituzte nonbait eta horiek jarri. Datu-basea osatze aldera gainerako herri eta ibarretako ikerlanen berri ematea ez legoke gaizki.