ARGIAko “bidaiariak” Karrajua blogean

Atalak: Euskara

Benito Fiz euskara irakasleak ARGIAren 2.176. zenbakian (2009-03-15) argitaratu dugun Hiru bidaiari euskarara artikulua irakurri du. Lan horretan, euskarara hurbildutako hiru lagunen elkarrizketak datoz. Benitok hirurak irakurri, hainbat pasarte nabarmendu eta hausnarketa interesgarriak egin ditu.

Hona mokadutxoak:

Enrike Díaz de Duranak ARGIAn: “Alde batetik, ondo euskaltegian, baina gelan denbora asko galtzen genuela iruditzen zitzaidan. Etxean ikasten ohituta nago, eta ez eskolan hainbeste ariketa egiten”.

Benito Fizek: “Modulazio luzeak, ordu asko, egunero eta… denbora galtzen ari direla sentitzen dute hauek? Egiten duten ahalegina ez da makala izaten egia esanda: 1000 ordu inguru egin ditzake ohiko ikasleak bi, hiru edo lau urtetan zehar, egunero. Nekagarria izan behar da ‘Uste dut zaila dela lan egin eta euskara ikastea, oso zaila’. Bidaia hori antolatzeko beste modurik ez dago? Bide beretik luzera berdineko etapak bata bestearen atzetik errepide berdinetik… hori baino ez? Ez saihesbiderik, ez laburbiderik? Beti autobus berdina?”.

Mixele Aguerre: “Kolegioan nintzelarik talde bikain horretan, trukea egin genuen Leitzako ikasle batzuekin. Hara iritsi ginenean, ikustea mundu hori, guk hemen ezagutzen ez genuena, hau da, karrikan jendeak, gazteak, zaharrak, denbora guztian euskaraz… ni harriturik nintzen! Hartan ez nuen halakorik ezagutzen, eta anitz markatu ninduen, biziki oroitzen naiz. Pentsatu genuen guk ere berdin egin beharko genukeela, eta horrela ere euskaraz egitera animatu ginen”.

Fizek: “Motibazioaz berba egiten denean faktore bati daukan garrantzia ematen ez zaiolakoan nago. Bizindar etnolinguistikoa-edo deitzen den hori. Inora joateko bidean jartzeko azken etapa hartako postal politak erakutsi behar dira seguruenik, ez hango pasaportearen zigiluak soilik. Baina hara helduta bidaiariak postalean ikusi duena ez dadila izan dekoratu hutsa edo miseria tapatzen duen monumentu turistiko hutsala”.

Jose Pérez Marotori galdera eta erantzuna ARGIAn: “Oraindik kostatzen zaizu euskaraz jardutea, baina ikasi duzun hori erabiltzen duzu? Lagunekin bai…”

Fizek: “Beti jakin nahi izan dut nor den lagun misteriotsu hori, euskara ikaslearekin euskaraz egiten duena. Ez dakit zergatik baina pertsonaia hori leienda urbanoa dela pentsatzeko joera izaten dut”.