Hondartzako gogoetak III

Atalak: Euskara

Zarautz.

Lankide batzuek galdetu didate (ironia handiz) ea aurten ez al ditudan hondartzako gogoetak idatzi behar. Iaz, uda ondoren, pare bat “hausnarketa soziolinguistiko” egin nituen. Aurten, lankideen “animoei” esker lehenago hastea erabaki dut. Honako hau eleaniztasunari buruzkoa da:

Zarauzko hondartzan etzanda nago. Ez dut ikusten, baina entzun bai. Ingelesez ari da, baina nabari du ingelesa ez duela ama hizkuntza. Hemengo azentua du, esango nuke euskalduna dela, gramatikalki ondo ari da, hiztegi ez oso aberatseko ingelesean. Gaztea dela ikusi dut eta urte batzuk gazteago direnei (14-15 urte?) uretara nola joango diren azaltzen ari da. “Udalekuak dira”, pentsatu dut. Baina udaleku arraroak, begiraleak ingelesez egiten du (justukoa) eta neska-mutilek euskaraz eta gaztelaniaz, bai beraien artean eta baita begiraleari ere. Begiraleak ez die konturik hartzen ingelesez hitz egiten ez dutelako, eta gazteak naturaltasun osoz ari dira euskaraz eta gaztelaniaz. Entzumena lantzen ariko dira, mintzapraktika behinik behin ez dute lortu.

Euskararen erabilera bultzatzea zein nekeza den etorri zait burura.