Adela Ramírezen hiru “bekatuak”: emakumea izatea, gaztelania ez jakitea eta pobrea izatea

Atalak: Gizartea

Adela Ramírez, askatasuna eman dion eskutitza eskutan duela.

Adela Ramírezek  22 urte zeuzkan Mexikoko Justiziak bere haurra hiltzeagatik epaitu eta kartzelara bidali zuenean. Chiapaseko txol komunitateko kideak ez zekien irakurtzen eta idazten, eta ez zekien gaztelaniaz. Txol hizkuntza hitz egiten zuen.

Erditzeko gutxi falta zitzaiola haurra galdu zuen eta epaileak erabaki zuen haurra nahi ez zuelako hil zuela. Epaiketan ez zuen itzultzailerik izan Ramírezek eta aurrean jarritako paper guztiak sinatu zituen. 15 urteko kartzela zigorra ezarri zioten. Presondegian gaztelania ikasi du eta bere bertsioa kontatu ahal izan du: eskaileretan erori eta konortea galdu zuen eta kolpeen ondorioz galdu zuen haurra. Zazpi urte eta erdi igaro ditu espetxean eta orain, Juan Sabines Chiapaseko gobernadoreak askatu egin du esanez atxiloketa bidegabea izan zela. Martha Figueroa abokatua ez dago oso seguru gaztelania ikasi eta bere burua defendatzeko aukera izan duelako askatu dutenik, hauteskundeak gertu egoteak zerikusia izango duela uste du. Figueroa abokatuak 30 urte daramatza bazterketa bizi duten emakumeak defendatzen eta hil honetan beste bi emakume kartzelatik ateratzea lortu du.

Mugimendu feministak, gizonak emakumea hildakoan familia harremana aringarri baino larrigarri izatea eskatu zuen, baita lortu ere. Figueroa abokatuaren ustez, emakumearen kontra darabilte lorpena, gizonek emakumea hiltzen dutenean ez baita erabiltzen, eta aldiz, emakumeek abortatzen dutenean edo erditze txarra izaten dutenean espetxe zigorrak izaten dituzte.

Adela Ramírez emakumea da, hizkuntza ez hegemoniko bateko komunitateko kidea eta pobrea da.

Albiste hau El País egunkariak ekarri du. Hemen osorik.