Karrikiri elkartea kexu da Iruñeko Udalak eta Sabadellek bere irudia erabili dutelako

Atalak: Euskara

U hizkiaren barruan irakur daiteke “Karrikiri elkartea”.

Creemos en Pamplona. Unidos por el desarrollo de nuestra sociedad. Izenburu horrekin egin dute iragarkia Iruñeko Udalak eta Sabadell bankuak. Hainbat irudiren artean Karrikiri elkartearena ageri da. Elkartea atsekabetuta dago, bi entitateentzat euskaraz bizi direnak ikusezin direlako egunerokoan, eta gainera, gaztelaniazko iragarkian agertu dutelako elkartea.

Karrikiri elkarteak ondoko idatzia bidali du ARGIAko erredakziora:

“Gure irudia nahi dute, gu ez gaituzte kontuan hartzen.

Harriturik gelditu gara KARRIKIRI gure elkartearen irudia Sabadell bankuarekin eta Iruñeko Udalarekin loturik ikusi dugunean. Nahasirik eta atsekabeturik gure entitatea, gure hiriko euskaldunen komunitatearen elkargunea, bi entitateren, bata publikoa, bestea pribatua, publizitatean ikusgarri ageri zela ikustean, kontuan harturik bi entitate horiek euskaraz bizi garenok ikusezin bihurtzen gaituztela, eta, kasu honetan, gainera, gure irudia gaztelania hutsean bere burua iragartzeko erabili dutela.

Udalaren jarrera nabarmen eta begi bistakoa da eta, azken urteotan, gutxieneko sentiberatasuna duen edozeinek ikusten ahal izan du euskaraz komunikatzen diren herritarrekiko erabiltzen duen bazterkeria. Iruñeko udala gaur kudeatzen dutenengandik herritarren bizikidetza eta kultura errespeturako gutxieneko balioen kontrako jarrerak, besterik ez dezakegu espero.

Bestetik, KARRIKIRI elkarteak, agerikoa denez, errespetatzen ditu beren gaurko edo balizko bezeroekin erlazionatzeko euskara erabiltzen ez duten entitate edo enpresa pribatuak. Uste dugu oker dabiltzala euskaldunen komunitatea interesgarri bezain zabala delako, baina, aipatu dugun bezala, haien enpresa erabaki eta estrategiak errespetatzen ditugu.  Baina, publizitatea gaztelania hutsean egiten dutenean, ordea, mezu bat igortzen ari dira bezerotzat nahi dituzten horiei dagokionez. Eta hori da, hain zuzen, eskatzen ari garena. Sabadell bankuak KARRIKIRIren irudia gure hirian publizitatea egiteko erabili nahi baldin badu, kontuan hartu beharko ditu nork osatzen dugun elkartea eta zein diren lortu nahi ditugun helburuak. Gure nortasuna kontuan hartu badu eta bere finantza-zerbitzuak euskaraz eskaintzea erabaki badu, erabaki bikaina iruditzen zaigu. Baina, kasu batean zein bestean, begi bistakoa da gure irudia erabiltzeko baimena eskatu behar digutela. Errespetu kontua da. Eskaintzen diegun bera eta galdatzen diegun bera.

Bukatzeko, herritarrei eta euskaldunei azaldu nahi diegu eskutitz ireki honetan nabarmen gelditu dena, hots, Iruñeko Udalak eta Sabadell bankuak gaztelania hutsezko munta handiko publizitate kanpaina abian jarri dutela, eta horretarako Karrikiri Elkartearen irudia erabili dutela, inor elkarte honekin harremanetan sartu gabe.

Hutsaren hurrengo sentitu gara, baldarki erabiliak. Aski da!”

Egunkarian egindako orri osoko iragarkia.