Politikariak eta herritarrak, ia denak Gallardónen aurka

Atalak: Gizartea

Apirilaren 5ean milaka lagun bildu ziren abortuaren lege erreformaren aurka Iruñean. Argazkia: Dani Blanco.

Uztailaren 3an eta 4an, Bizitzeko Eskubidearen aldeko Nazioarteko Mintegian bildu dira hainbat parlamentari Madrilgo Diputatuen Kongresuan. Alboko aretotik, emakumeen elkarteek eta oposizioko alderdiek ezetz esan diete, ez dutela abortuaren lege erreforma onartuko.

Europako eta Hego Amerikako 100 bat parlamentari bildu dira Bizitzeko Eskubidearen aldeko Nazioarteko Mintegian. Beste modu batez esanda, Alberto Ruiz Gallardón Espainiako Justizia ministroak aurrera atera nahi duen abortuaren lege erreformaren aldeko aldarria egin dute.

Parte-hartzaileen profila ikusi besterik ez dago. Luis Peral PPko senatariak Gallardónen legea defendatu zuenean ondokoa esan zuen: “Abortua genero biolentzia mota bat da” eta “abortua giza ekosistemaren aurkako erasoa da”.

Liliana Negre senataria Argentinatik joan da. Cristina Fernándezen alderdikoa da eta gobernuak bultzatutako homosexualen arteko ezkontzaren aurka agertu zen.

Uztailaren 3an hasi zen mintegiari hasiera ematekoa zen Gallardón ministroa, baina azkenean atzera egin zuen eta ez zen agertu.

Gainontzeko ia alderdi guztiak kontra

Espainiako Kongresuan bertan, oso gertu dagoen beste areto batean bildu ziren lege erreforma gaitzesten dutenak. Oposizioko alderdi guztietako ordezkariak zeuden, UPyDkoak salbu. Alderdi hori legea aldatzearen aurka dago, baina mintegian parte hartzeari uko egin zion.

Rosa Díez buru duen alderdiaz aparte, 2010eko abortuaren legea onartu zuten alderdi guztiak zeuden bilkuran: PSOE, CiU, EAJ, IU, ICV, BNG, Geroa Bai eta ERC.

Talde parlamentarioetako kideez gain, emakumeen elkarteak, feminista esanguratsuak, sindikatuak eta jendarteko hainbat kide bildu ziren. Lege berriaren aurkako ahotsek adierazi dute, legea onartuz gero, emakumearen eskubideek atzerakada larria jasango dutela eta abortu klandestinoen garai ilunetara itzuliko garela.