Bergarako Jardun euskara elkartea biziberritzeko gogoeta abian

Atalak: Euskara

1990. urtean sortu zen Jardun euskara elkartea.

Mende laurdena da Bergaran Jardun euskara elkartea sortu zela. Beste 25 urtez jarraitzeko gogoz daude, beharra dagoela badakitelako. Gaur egun euskara elkarteak nondik jo behar duen hausnartu nahi dute, norabide egokia aurkitu, garaiak aldatu egin baitira. Hiru saioko gogoeta irekia iragarri dute.

Euskara elkarteak 15 langile ditu eta 565 bazkide. Ondoko bi galderak bederen egin dituzte Jardun euskara elkarteko kideek: [Hasierako] Funtzio berberak bete beharko lituzke gaur egun Jardunek? Bergarako euskararen egoeraren beharrak orain dela 25 urteko berdinak al dira? Galderok ez dira ari egiten Bergarako euskara elkartekoak soilik, gero eta gehiago dira mende laurdeneko adina duten euskara elkarteak eta sorrerako ildo ideologikoak, diskurtsoak, birplanteatzeko garaia iritsia da.

Hiru hausnarketa saio prestatu ditu Jardunek. Lehenengoa, “Unea eta Bihotza” izenekoa, urriaren 25ean izango da. Parte-hartze prozesuaren arrazoiak eta metodologia aurkeztuko dituzte, eta euskaltzaleen aktibatzea eta euskararen egoeraren diagnostikoari buruzko gogoeta egingo dute. Bigarren saioa (“Iparrak”) azaroaren 15ean izango da. Jardunek datozen bost, hamar urteei begira izan beharko lituzkeen helburu eta funtzioak hausnartu, eztabaidatu eta adostuko dituzte. Hirugarren saioa (“Etxea”) azaroaren 29an egingo dute. Jardunen antolakuntza eredu parte-hartzaileago bat eraikitze alderako saioa izango da.