Berdin eragiten al dio antidepresibo berak gizonari eta emakumeari?

Atalak: Gizartea

Emakumeek ez dute parte hartu entsegu klinikoetan atzo arte. Argazkia: es.scott.net.

Gizonen eta emakumeen sistema hormonalak, anatomiak eta metabolismoak ez dira berdinak, eta sendagaiek desberdin eragiten die batari eta besteari. Hala ere, entsegu klinikoetan botikak ia erabat gizonekin probatzen dituzte, emakumeen sistema hormonala nahasgarritzat hartzen delako.

Sendagai berriak sortzerakoan, sexu bataren eta bestearen artean egon daitezkeen diferentziak ez dira luzaz kontuan hartu. Orain dela hogei bat urtera arte emakumeek entsegu klinikoetan parte hartzea debekatuta zuten.

Dirudienez, hainbat sendagaik eragin gogorragoa du emakumeengan, eta albo ondorioak jasateko probabilitatea %50 eta %75 artean igo daiteke. Adibide bat ematearren, Amerikako Estatu Batuetan, 1997 eta 2001 urteen artean, Sendagai eta Elikagai Agentziak merkatutik kendutako hamar botikatik zortzi gizonentzat baino emakumeentzat arriskutsuago zirela azaldu zen.

Analgesiko opiazeoak eraginkorragoak dira emakumeengan, agian ziklo menstrualen gorabeherak dituen estrogenoak mina modulatzen duelako.

Antidepresibo batzuek ere, eragin indartsuagoa dute emakumeengan. Arrazoiak bat baino gehiago izan daitezke: odolak finkatze gaitasun gutxiago dauka; emakumearen urdaila gizonarena baino garratzagoa da; litekeena da emakumeak gorputzean duen gantzagatik antidepresiboak organismoan denbora gehiagoz gordetzea.

Dena dela, neurri handi batean, aipatu ditugun desberdintasunak hipotesiak baino ez dira, ikerketa oso gutxi egin baita.