Hiru pauso Osakidetzari historia klinikoa eta odol analisiak euskaraz eskatzeko

Atalak: Euskara

Donostiarrek, bere garaian, pediatra eta familia mediku euskalduna eskatu zituzten. Zoritxarrez eskaera mota asko daude egiteko han eta hemen. Argazkia: irutxulo.hitza.info.

Odol analisiak, historia klinikoa, medikua bera… gaztelaniaz. “Bihar kexa jarriko dut!” esan eta gero ezer egiten ez duen horietakoa al zara? Formula erraza prestatu dugu Elebidera hainbat eskaera bideratzeko. Zoritxarrez modu askotako kexak eta eskaerak egin diezazkiokegu Osakidetzari, hizkuntza eskubideak errespetatzen ez dituelako. Azkar eta erraz egin ahal izateko bost aukeratu ditugu eta nola egin azalduko dugu.

Osakidetzari bost eskaera hauek egingo dizkiogu:

1- Lehentasunezko hizkuntza erregistroan gurea euskara izatea.
2- Odol analisiak euskaraz izatea.
3- Ekografiak euskaraz izatea.
4- Erresonantziak euskaraz izatea.
5- Historia klinikoa euskaraz izatea.

(Gai bakoitzeko eskaera-testuen prestaketa Berdin elkarte sortu berriko Aitor Montes medikuari zor diogu)

Ekainaren 9ko posdata: Berria egunkariak Osakidetzak zerbitzuak euskalduntzeko duen egitasmoen berri eman du. Laburbilduta ondoko asmoak agertu ditu Osakidetzak:

–Odol eta gernu analisiak: Urte amaierarako ele bitan.

–Lehentasunezko hizkuntza erregistroan: Txartel berria dutenei edo aldatu dutenei galdetzen hasi dira Osakidetzarekin harremana euskaraz ala gaztelaniaz nahi duten. Gainerakoentzat ere jarriko omen dute, baina ez dute eperik zehaztu.

–Historia klinikoa: Izan liteke gaztelaniaz mantentzea eta euskaraz laburpena ipintzea. Dena dela, ez dute ele bitarako pausoa emateko eperik zehaztu.

Poztuko gara agindutakoak betetzen badira. Hala ere, zoritxarrez, presioa egiten jarraitu beharko dugu Osakidetza euskaldundu arte.