200 euskaltzalek hartu dute parte Egian Euskaraz ekimenean

Atalak: Euskara

Bi hilabeteko ekimena bukatzear da. Pozik dira bultzatzaileak eta ondorio batera iritsi dira: uste baino gehiagotan egin daiteke euskaraz.

Otsailaren 26an azken lekuko aldaketa egin dute. Aitor Ikastola, Maria Reina ikastetxea eta Latxaga Guraso elkarteak astebetez euskaraz egin ondoren, lekukoa Egia auzoko norbanakoei pasa diete. Martxoaren 4an bukatuko da ekimena norbanakoen saioarekin.

Egian Euskaraz Bizi Nahi Dugulako ekimenaren sustatzaileen iritziz, “erabat aberasgarria izan da hilabete eta erdi honetan Egian gertatutakoa. Erratzeko beldurrik gabe esan daiteke ez dela inoiz horrelako esperientziarik martxan jarri Euskal Herrian”.

Jokamolde batzuk adostu dituzte astean-astean parte hartu duten eragile eta norbanakoek, helburua ahalik eta euskara gehien hitz egitea izanik: lehen hitza euskaraz; ulertzeko gai denarekin euskaraz egitea; eta egoera zailetan irribarrez eta euskaraz erantzutea.

Martxoaren 12an Egia Euskaraz Eguna ospatuko dute eta han partekatuko dute urtarrilaren 8tik bizitakoa. Parte-hartzaileek kartulinatan idatziko dituzte haien sentsazioak eta eguneroko gisa erabilitako koadernotxoak ere ikusgai jarriko dituzte. Esperientziaren balorazioaz gain aurrera begira zer egin aztertuko dute. Dena ez da hausnarketa izango, egun osoko egitaraua antolatu dute, jai giroan murgildu ahal izateko.