Sorterriak baino hizkuntzak ematen digu nazio nortasuna

Atalak: Hizkuntzak, Nazioartea

Hizkuntza nazio nortasunaren oinarri. Infograma: Pew Research Center.

Munduko hainbat herrialdetan egindako ikerketa baten ondorioa da. Herritarrei nazio nortasunaren ezaugarri garrantzitsuena zein den galdetu zaie, eta lehen postuan geratu da nazio hizkuntza.

Pew Research Center-ek egin du ikerketa. AEBetako, Kanadako, Europako, Australiako eta Japoniako 14.514 biztanleri egin dizkiote galderak. Nazio nortasunaren marka nagusia zein den galdetu diete, ikerketaz artikulua egin duen kazetariak dioen bezala, “egiazko” frantziar edo japoniar izateko zer behar den galdetu zaie. Nazio nortasuna esaten dutenean, estatua duten herrialdeez ari dira.

Herrialde batzuetako salbuespenak salbuespen, herritarrek diote hizkuntza dela nazio nortasuna azpimarratzen duen elementua, atzerago geratzen dira erlijioa, tradizioak eta sorterria.

Ikerketak infograma asko ditu eta hona bi baino ez ditugu ekarri. Lehenengoan ondokoari erantzun behar zioten: “Egiazkoa” izateko gure hizkuntza hitz egiteko gaitasuna izatea oso garrantzitsua da. Frantziako biztanleen %77k dio hala dela eta Espainiako %62k.

Bigarren infograman “egiazkoa” izateko zer den garrantzitsua esaten dute herritarrek. Berde ilunez ageri da oso garrantzitsutzat dutenen ehunekoa eta lau elementu hauek aipatu dituzte: Nazio hizkuntza hitz egiteko gaitasuna; ohiturak eta tradizioak elkarbanatzea; herrialde horretan jaio izana; kristaua edo katolikoa izatea.

Hizkuntza, tradizioak, erlijioa eta sorterria, lau ezaugarri nagusiak. Infograma: Pew Research Center.