Nire telefonoak badaki euskaraz, mirariz

Atalak: Euskara

Gipuzkoako herria, 15.000 biztanletik gorakoa, euskaldunak %70 inguru. Telefono konpainiako dendaria bertakoa da (hitz egiteko moduagatik), euskaldun petoa. Menua euskaraz daukan mugikorra eskatu diot, Hizkuntza Politikarako Sailburuordetzak egindako kanpaina daukat buruan. Halako batean telefono modelo bat erakutsi dit, euskaraz dakien bakarra da.

Esan diot dendariari mugikorra harrapatu didatela eta berria behar dudala. Menua euskaraz daukana mesedez.

– Euskaraz?

– Bai, euskaraz.

– Menua euskaraz mugikor gutxik daukate, ez dakit bateren bat ba ote daukadan.

– Irratiz eta telebistaz jakin dut, baita prentsaren bidez ere. Jaurlaritzak hitzarmenak egin ditu hainbat telefonia konpainiarekin mugikorrek menua euskaraz izan dezaten.

– Bai, baina gutxik daukate euskaraz, eta gainera, modelo berriei jarriko diete euskarazkoa, oraindik ez dira berriak iritsi.

– Orduan HPSren kanpainak zer esan nahi du, hitzarmenak sinatu dituztela, baina euskaraz dakiten mugikorrak geroago etorriko direla? Nik holakorik ez dut inon entzun.

Urduri jartzen hasi naiz: “Baietz joan etxera euskarazko mugikorrik gabe!”. Halako batean miraria gertatu da. Lankidea sartu da dendan eta segituan galdetu dio nirekin ari zenak: “Euskarazko menua duen mugikorrik ba al daukagu?”. Lankideak besoa luzatu eta bat eman dio.

– Begira, honek euskarazkoa dauka.

– Eta zenbat balio du?

– 49 euro.

– Eta gaztelaniazkoak zein preziotakoak dituzu?

– Merkeena 19 euro eta erdibidekoa 35 euro.

– Orduan 14 euro gehiago ordaindu beharko ditut euskarazkoa hartzeagatik.

-…

Hizkuntza Politikarako Sailburuordetzak kanpainan emandako datuak dira ondokoak: sei telefono operadorerekin eta lau fabrikatzailerekin egin dute hitzarmena, guztira 174 telefono mugikor modelok euskarazko menua dute.

Saltzailea herri euskaldunean dendari, bera euskaldun petoa, atsegina tratuan… ez dut imajinatu ere egin nahi beste hainbat dendetan 174 modelo horietatik zenbat izango dituzten…