Senarrak senarra hiltzea, indarkeria matxista ala etxeko indarkeria?

Atalak: Gizartea

Irudian, gay komunitateak etxeko indarkeriaz egindako kanpaina (argazkia: Periodista Digital).

Gay eta lesbianen elkarteek genero bereko bikoteentzako babes psikologikoa eta juridikoa aldarrikatzen dute, bortizkeria tarteko denean. 2004ko Genero Bortizkeriaren Legetik kanpo geratzen dira halako tratu txar egoerak.

Koldo Losada aktore getxoztarra ustez bere senarrak hil duela jakin eta gero, eztabaida zaharra berritu da eta eldiario.es egunkariak gay eta lesbianen elkarteen aldarrikapenak mahai gainean jarri ditu berriz.

Elkarte askok 2004ko Genero Bortizkeriaren Legea aldatzea eskatzen dute. Lege honek genero arteko desberdintasuna bizi dugun gizarte honetan, gizonarengandik bortizkeria jasaten duen emakumea babesten du. Ezkonduta egon daitezke edo bikote harremana izan. Eldiario.es-i adierazpenak egin dizkioten abokatuen ustez, 2004ko legea ondo dago eta emakumeak babesteko balio du. Emakumeek gizonei tratu txarrak ematea eta genero berekoek bortizkeria erabiltzea bikote harremanetan noizbehinkakoa da. Gaur egun, genero bereko bikoteen arteko bortizkeria etxeko indarkeria gisa sailkatzen da, adibidez, aitak semeari tratu txarrak emango balizkio bezala.

2011n, Espainiako Estatuko Gay, Lesbiana, Transexual eta Bisexualen elkarteak gai hau landu zuen. Txosten haren arabera, mota honetako tratu txarrak ezkutuan geratzen dira; ez dira salatzen, eta beraz, ez da inolako kontaketarik egiten. Mitoak hor dirau: genero berekoak direnez bikote horietan hierarkian ez dago alderik, eta beraz, tratu txarrak bortizkeria izan daitezkeenik ere ez da planteatzen. Bi gizon diren kasuan gainera, gizona ez da biktimatzat hartzen. 2011ko txostenak dioenez, ohikoa da laguntza eskatuta ere erantzun pattala izatea, 2004ko legearen barruan ez baitira kasu horiek sartzen. Horregatik eskatzen dute lege aldaketa, behar izanez gero, babes juridikoa, psikologikoa eta asistentzia eduki ahal izateko.