Argazkikoa ni al naiz?

Atalak: Gizartea

Ezkerrekoan Inma Cuestaren argitaratutako argazkia, eskuinean mugikorrarekin momentuan ateratakoa. Argazkia: Inma Cuesta, Istagram.

Lehenengo aldia da Espainiar Estatuko aktore emakume batek argazkietako ukituak zorrotz salatzen dituela. Inma Cuestak adierazkortasunik gabeko panpina argitaratu dutela salatu du.

Pelikula promozionatu behar eta argazkiak atera dizkie aktoreei. Horietako bi, Inma Cuesta eta Eduardo Noriega, El Periódico egunkariaren asteburuetako aldizkarian azala izan dira. Cuestari ez dio batere graziarik egin argitaratu duten argazkiak (Noriega ez dut aditu ezer esaten bere argazkiaz. Gizonen argazkiak ez ote dituzte “konpontzen”?). Mugikorrean gordeta dauka argazki sesioko argazki originala eta biak ondoan jarrita norbaitek miraria egin duela nabari da: lepoa findu-luzatu zaio, aldaken biribiltasuna desagertu da, besoa mehetu diote eta ilerik gabe utzi.

Cuesta aktorea amorratuta dago: “Ez dut ulertzen nire gorputza naizenaren erdira murrizteko beharra. Errealitatearen mugak gainditu ditu eta lotsa ematen dit. Zein edertasun kanon jarraitu behar ditugun hausnartu behar dugu”. Esanguratsua da photoshopa erabili duen Vicente Moreno argazkilariak esan duena: “Urteak daramatzat moda sesioak egiten eta inoiz ez dut arazorik izan ukituengatik”.

Espainiar Estatuan halako erabilera salatzea ohikoa ez bada ere, emakumeak artifizialki “eder” azaltzeko manipulazioak gero eta gehiago salatzen dituzte ospetsuek beraiek. Kate Winslet aktore ingelesak aitortu zuen aldizkari bateko azalean (ikus argazkia) hanken lodiera hirutik bat behintzat murriztu ziotela.

Argazkikoan baino hanka gizenagoak zituen nonbait Kate Winslet aktoreak.

Zuk halako gorputz azalik ezagutzen al duzu?

Boggie kantari hungariarrak bideoa grabatu zuen manipulazioak salatzeko. Abesten duen bitartean aurpegia editatzen diote, besteak beste, begi kolorea, azal kolorea, ilea ukituz.