“Sutondoko kontuak” liburua: soziolinguistika dosiak pasadizoka

Atalak: Euskara

Soziolinguistika dosiak jaso ditu egileak liburuan.

Txerra Rodriguezek soziolinguistika du lanbide eta ikasbide. Jakintza hori modu ulerterrazean zabaltzea du helburu. Intentzio horrekin argitaratu berri du Sutondoko kontuak (Autoedizioa) liburua.

Hala dio berak: “Soziolinguistika gure errealitate hurbila eraldatzeko zientzia gisa baino ez dut ikusten eta, zentzu horretan, liburu honek bere xumean eraldatze bide horretan aurrerapauso txikia izan gura du”.

Pasarte motzez osatutako liburua da, batzuetan bere bizitzako pasadizoak aztertzen ditu gako soziolinguistikoen arabera, beste batzuetan, eta berak dioen moduan, “lapurreta asko duen liburua da”. Alegia, gai horren inguruan batean eta bestean idazleek, bertsolariek, euskalgintzako eragileek esandakoak jaso ditu eta bere gogoetak gehitu.

Liburuaren egilearen aititak ez zuen ogirik erosten igandetan okinek astean behin atsedena behar zutela aldarrikatu nahi zuelako. Intsumisio ekintza txiki hori kontatu du Rodriguezek, egunero euskara erabili ahal izateko egin behar izaten diren intsumisioak gogoan.

Beste pasarte batean Imanol Minerren “armairutik ateratzea” kontzeptua jaso du. “Hiztuna askatu, autodeterminatu, ahaldundu, boteretu behar dugu” dio Minerrek. Eta Ferran Suayk espaloitik ez jaisteko dio eta osabak Bahametan bizitako anekdota kontatzen du. Eta Algortako andre batek esan omen zuen Algortan euskarak porro usaina duela… eta hausnarketarako baliagarri diren estilo horretako pasadizoak hamarnaka.

Non erosi

Anti (Bilbo); Arinka (Derio); Hiruka, Bizarra Lepoan eta Albeko lokalak (Algorta); Zurrumurru (Ondarroa); Katakrak eta Karrikiri (Iruñea); Xibero Bio denda (Maule); Amikuze (Donapaleu); Kukuxka (Garazi); Arkupe (Santurtzi); Olgeta (Arrasate); Durangoko Azoka (autoedizioetako mahaia).

Aurkezpenak

– Bilbon: azaroaren 23an, 19:00tan, Kafe Antzokian.

– Derion: abenduan, data zehazteke.

– Durangon: abenduaren 6an, 16:00tan, azokako Areto Nagusian.

Hitzen Uberan webgunean egin dioten elkarrizketa irakurri nahi baduzu jo lotura honetara.