%14,7ko euskara erabilera: Errenteriarrak zifra lehertzen saiatuko dira astebetez

Atalak: Hizkuntzak

Errenteriarrak euskaraz bizitzera animatzen. Argazkia: AsteBATzuk ekimena.

Astebetez helduko diote erronkari errenteriarrek, apirilaren 1etik 8ra. Lau Haizetara Euskaldunon Elkarteak eta AEKren Xenpelar euskaltegiak antolatu dute.

Egiatarrek urratutako bidea ezagutzen dute, badakite Hernanin, Lasarte-Orian, Agurainen, Arrigorriagan eta beste hainbat lekutan antzeko saioak egin dituztela. Probatzea pentsatu dute, esperientzia berria izango da beraientzat, eta ikuspegi kolektiboa eman diote. Argi diote ez dela izango jai bat, ezta jarduerez betetako astea ere.

“Aste BatZUK, euskararen eroaleak” egitasmo horretan euskal hiztunei ikusgarritasuna emango diote, “ero batzuk elkartuta gauza ikaragarriak eta zoragarriak atera daitezke. Seguru gaude arrastoa utziko dugula geure herrian eta Errenteriak duen erdaldun-fama alboratzen hasiko gara”.

Euskaldunek jokabide aktiboa hartzea da helburua, bestela esanda, lehen, bigarren eta hirugarren hitza euskaraz egitea. Euskara erabiltzeko eta ezagutzeko gogoa indartu nahi dute, azken finean errenteriarrek bestelako jarrera bat hartzea.

Lasarte-Oriako erronkan erabili zituzten rol berak prestatu dituzte: ‘ahobiziak’ eta ‘belarriprestak’. Lehenak euskaraz biziko dira edonorekin eta bigarrenek adieraziko dute hitz egiteko gai ez baina ulertzeko gai direla.

Bestalde, Soziolinguistika Klusterrak duela oso gutxi atera ditu Errenteriako 2016ko hizkuntza erabileraren kale neurketaren emaitzak. Ondoko argazkian ikus ditzakezue emaitza esanguratsuenak eta Klusterraren lotura honetan txosten osatuagoa dago.

Infograma: Soziolinguistika Klusterra.

Ondoren datozen bideoak “Aste BatZUK, euskararen eroaleak” egitasmokoak dira. Lehen bietan “belarriprest” eta “ahobizi” zer den azaltzen dute herritarrek, eta ondorengo bietan, Jon Maya eta Naroa Iturri herritarrek egitasmoan parte hartzeko gonbidapena egin dute.