Udaltop 2010. Kultur Kabia nerabe arrantzan

Atalak: Euskara

Aritza Escandon.

Aritza Escandon Kultur Kabia Zerbitzuak enpresako zuzendaria da. Euskara Elkarteen Federazioak, Topaguneak, sortutako enpresa da Kultur Kabia. Nerabeak eta euskarazko kultur kontsumoa lotzean argi esan zuen Escandonek: “Kontsumitu nahi dutena eskaini behar zaie”.

Bezero askorentzat egin du lan Kultur Kabiak, batik bat udalentzat. Bilboko Udalarentzat egindako lana aipatu zuen, berbarako, Escandonek. Bizkaiko hiriburuan 14.000 nerabe hartu behar dira kontuan. 12 eta 18 urte artekoak sartzen dituzte zakuan. Escandonen ustez, “adinik kritikoena da hizkuntza ohiturak aldatzeko”. Kultur Kabia enpresako zuzendariak garbi azaldu zuen nerabeak euskarara hurbiltzeko eta kultura euskaraz kontsumitzeko moduaz: nahi duena eskaini. Nerabeak askotan lotzen du euskara eskolarekin, astuntasunarekin, “yuyua ematen die euskarak”. Beraz, euskara erabiltzera motibatzeko hizkuntza gozamenarekin lotu beharko litzateke. Adibide batzuk aipatu zituen, hala nola, moda desfilea, Mihiluze proba, Izarren Distira musika ekitaldia… Ondoko galderak bota zituen Escandonek: “Kontsumo masiboaz ari bagara, zein da jokalekua? Nondik datoz aisialdi ereduak? Eremu urbanotik. Kontsumitzaileari nahi duena eman behar diogu, askotan, produktuari helburu asko jartzen dizkiogu. Gazteria, Ingurumen, Integrazio, Kultura Sailaren… baldintzak betetzen baditu hobeto, baina nerabeak erakartzeko gaitasunik ba al du produktu horrek?”.

Dena dela, argi geratu zen moda desfile eta musika ekitaldien bidez soilik nerabeek euskaraz egitea ez dagoela ziurtatuta, gune horiek tantatxoak direla, Escandonek esanda bezala, “probokazioak”.