Entzule gaztelania-hiztuna irrati esataria galegoz ez egiteko konbentzitu nahian

Atalak: Hizkuntzak

Emunek audio interesgarria zintzilikatu du Telp tailerrei buruzko blogean. Gune honetan hainbat egoeratan euskaldunok sufritzen dugun deserosotasuna murrizteko, hizkuntza jokaera asertiboari esker gusturago egoteko eta euskara gehiagotan erabili ahal izateko baliabideak eskaintzen dituzte. Blogean ariketak proposatu ohi dituzte hizkuntza gatazkak sortzen direnean nola moldatu ikasteko. Radio Galegako Alberto Freire esatariaren inprobisazioa entzungo dugu Emunen blogean paratutako audioan, galegoz ari delako kexu den entzuleari erantzun beharko baitio.

Entzulearen ustez, irrati esatariak, eta irratiak berak, gaztelaniaz egin behar dute, gaztelania denen hizkuntza delako. Berak ingelesa eta frantsesa hitz egiten ditu gaztelaniaz gain, baina ez dauka galegoa ikasteko interesik. Hasieran esan dio Freire esatariari ez zaiola zuzena iruditzen berak galegoz hitz egitea, berotu denean heziketa txarrekoa dela esan dio. Berak lehenengo hitza gaztelaniaz egiten badu, gaztelaniaz erantzun behar zaiola dio… Aurreiritziz jositako erretolika dauka entzuleak. Esataria haren argumentuak ematen aritu da. Argumentazioan polito moldatu dela iruditu zait.

Pena, lasai hasi den eztabaida bukaerarako gehiegi sutu da. Haserretu eta berotu egin dira biak. Elkarri hitza moztu diote, ozenago hitz egiten hasi dira… Entzuleak horrelako jarrera hartzeak ez gaitu harritu, baina esatariak (hizkuntza gutxiagotuaren defendatzaile gisa) galtzeko gehiago zeukan. Tinko, baina hotz, egotea tokatzen zitzaion, nire ustez.

Ai, zein zaila den gure onetik atera gabe horrelakoetan tente geratzea. Tailerretik sarri pasa beharko…