“Ekarri eskopeta tiro egingo diot eta”

Atalak: Gizartea

“Hey, hey, hey” du izena abestiak eta Los Tres musika talde txiletarrarena da. Letra eta bideoklipa aho zabalik geratzeko horietakoak dira, emakumeen aurkako biolentziaren agerpen gordina (taldekideek diote apologiarik ez zutela egin nahi inondik inora). Edo agian ez da hainbeste harritzekoa, hamarnaka horrelako ikusiak gara, eta sarean aurki daitezke. Bitxia egin zait genero biolentziaren kontrako konpromiso sendoa erakutsi izan duen Luis Tosar aktoreak bideoklipean parte hartu izana.

“Ekarri eskopeta zeren tiro egingo diot / traizionatu nauen nire maiteari”, edo “ Lurra bustita dago niregandik isurtzen diren malkoez / zorua gorri isuriko dudan odolez / mila aldiz esan nion ez uzteko / eta orain bere patua nik erabakiko dut”. Abestiaren puskak dira. Iruditan berriz, fideltasunik gorde ez dion emakumea hiltzen du gizonak. Ondoren polizia (Luis Tosar aktore galiziarra) lankidearekin sexu harremanetan ageri da. Lankide hori beste batekin harremanetan harrapatzen du eta irudietan elipsiak badira ere, uler daiteke Tosar poliziak bi lankideak hil dituela. Biak emakumeak dira.

Dirudienez, bideoklipa sare sozialetan hona-hara ibili da eta halako batean Galiziako Implicadas No Desenvolvemento gobernuz kanpoko erakundearen belarrietara heldu da kontua. GKE honek 16 urte daramatza emakumeen kontrako biolentziaren aurkako lanean eta Luis Tosar aktoreak urteak zeramatzan haiekin lankidetzan. GKEak urtero Implícate jaialdia egiten du eta bideoklipa ikusita Luis Tosarri aurten parte ez hartzeko eskatu diote, koherentziagatik. Aktoreak idatziz barkamena eskatu du eta aitzakiarik ez dagoela dio. Bideoklipa gogorra eta erabat arbuiagarria iruditu zait, baina harritu nauena Luis Tosarrek halako gidoia irentsi eta parte hartzea izan da. Galiziar aktoreak, besteak beste, “Te doy mis ojos” (2003, Icíar Bollaín) film bikainean hartu du parte. Emakumeen kontrako biolentziari buruzko pelikula sinesgarrian aktore nagusia izan zen.

Genero biolentziarekiko halako konpromisoa duenari zein argi itzali zitzaion egun hartan? Zein zaila den betaurreko matxistak eranzteko pauso sendoak ematea, eta zein erraz egiten den atzera.