‘Moda vasca’ etiketa: gaztelaniaz salduko al dugu gure arropa?

Atalak: Euskara

Arrasateko Ternua enpresak euskaraz ditu enpresaren izena (Ternua) eta leloa (Non gogoa, han zangoa).

EAEko moda industria biltzen duen klusterrak Basquemoda du izena, eta uda ondoren, EAEn diseinatutako arropari “Moda Vasca” etiketa jarriko diote. “Bertako produkzioa identifikatzea eta desberdintzea” nahi du klusterrak. Bere buruari ingelesez jarri zioten izena eta etiketa gaztelaniaz sortuko dute.

Euskal Herria Esneak eta Ternuak mahaiaren inguruan iaz gai honetaz egindako hausnarketa etorri zait burura. Argian erreportajeari “Zer garen erakutsi gurea saltzeko” izenburua jarri genion. Julio Ibarrak Euskal Herria Esnearen izenean ondokoa zioen: “Saltzen duzuna baserrikoa dela badiozu, hemen egindakoa, euskara hutsean aritzeak ematen dio markari plus bat”. Ternuako Rikardo Idiakezek berriz, hauxe zioen: “Euskararen, Euskal Herriko historiaren eta izaeraren gainean sortutako marka da gurea, beraz erabakiak berarekin zekarren euskara erabiltzea. Izaerak berak eskatzen zuen. Nazioartera zabaldu izanagatik, gure nahia izaera eta filosofia bera mantentzea izan da, eta halaxe mantendu dugu merkatu berrietan ere. Horren adibide da leloa, bera mantentzen dugu: Non gogoa, han zangoa”.