“Seme-alabak maite ditut, baina ez dut ama izan nahi”

Atalak: Gizartea

Israelgo 23 amarekin egindako ikerketa da. Ama izateaz damutzen dira. Erabakitzeko aukerarik gabe seme-alabak ekarri dituztela iritzi diote. Orna Donathen “Regretting motherhood: sociopolitical analysis” lanak hautsak harrotu zituen iaz sare sozialetan.

Orna Donath israeldarrak 23 herrikide elkarrizketatu zituen 2008an. Ama damutuak ziren denak, 26 eta 73 urte artekoak, klase sozial guztietakoak. 2015ean ondorioak argitaratu zituen eta Alemaniako sare sozialetan eztabaida sutsua sortu zen.

Ez da erraza ulertzen izenburuan jarri dugun esaldia: “Seme-alabak maite ditut, baina ez dut ama izan nahi”. Ondoko adierazpenak ere (ikerketako partaide baten hitzak dira) ez du ulertzen asko laguntzen, testuingurua lantzen ez bada: “Damu naiz haurrak izan ditudalako eta ama izan naizelako, baina dauzkadan umeak maite ditut. Bada bai, ezin dut azaldu afera hau. Zeren damu banintz ez nuke nahi seme-alabak hemen egotea. Baina ez nuke halakorik nahi, nahi ez dudan gauza bakarra ama izatea da”.

Ikerketako partaideek haien seme-alabak eta amatasunaren esperientzia bereizten dituzte. Amatasuna, Mendebaldeko amatasun eredua, zama sozial astun gisa bizi dute eta bizi izan dute amok. Ama izatea ez dutela erabaki sentitzen dute, bizitzan zer egin nahi zuten pentsatzeko astirik eta aukerarik gabe ama izan dira. Horixe zen haiengandik espero zena, ama izan behar zuten. Behin umea ekarrita, nolako ama izan behar zuten “irakatsi” die gizarteak. Ama etsituak, ama iruzurtuak, ama osatugabeak, deseginak, edo besterik gabe, aspertuak sentitzen dira. Ama izatea giza harreman modu bat gehiago bezala bizi beharrean, derrigorrezko rol gisa bete dute eta damutu egin dira.

Irailaren 8an “Madres arrepentidas. Una mirada radical a la maternidad y sus falacias sociales” (Reservoir Books) liburua gaztelaniaz kaleratuko da. Argitalpenaren berri El Confidencial agerkarian izan dugu, eta hark liburuaren mamian sakondu du.

Orna Donathen ikerketa ingelesez irakurri nahi izanez gero, pdf honetan aurkituko duzue.