Espainiako etxeko langileek lehen aldiz egin dute biltzarra

Atalak: Ekonomia, Gizartea

Etxeko langileen erdiak baino gehiagok egun erdiz egiten du lan. Argazkia: Alvaro Minguito.

Madrilen bildu dira urriaren hasieran. Lan Hitzarmenari atxikitzeko eskatu diote Gobernuari. Espainiako Estatuan 627.800 langile ari dira kontratupean eta beste asko kontraturik gabe. Espainiako enpleguaren %3,4 biltzen du.

Madrilgo Udalak eta Grupo Turínek (hainbat gizarte mugimendu biltzen dituen plataforma) antolatu dute lehen aldiz egin den etxeko langileen biltzarra. Partaideetako bat izan da Alicia Pacas salvadorkoa. Lanetik bota zuten hamabostean behin medikuarengana joateko ordu-erdi eskatu zuelako. Biltzarra bukatuta ondoko balorazioa egin du: “Garrantzitsuena aurpegiak erakustea izan da, etxeko langileak pertsonak garela esatea, bagarela esatea. Etxeetan gaude, baina ezikusiarena egiten dute. Garrantzitsuena alkandora ondo lisatzea da, otordua ondo prestatzea, etxea txukun edukitzea, umeak ondo zaintzea, etxeko lanetan laguntzea. Ez dio axola gu nola gauden, nahiz eta gu gabe mundua ez den mugitzen”.

Espainiako Gobernuari Lanaren Nazioarteko Erakundearen C189 hitzarmenari atxikitzea eskatu diote biltzarrean, etxeko langileen lan baldintzak duinak izan daitezen.

UGT sindikatuaren ikerketa baten arabera, krisi garaian soldatek behera egin zuten. 2008an, egun osoko batez besteko soldata 857 eurokoa zen, eta 2014an 745ekoa. Egun erdiko soldatak gehiago egin du behera. 2008an, 523koa zen eta 2014an 378koa. Txosten berak dioenez, etxeko langileen hiru ezaugarri nagusiak ondokoak dira: soldata jaitsiera, egun erdiko lana eta kontraturik gabe lanean aritzea.

Emakumeak Aurrera kooperatiba Muskizen

Lan baldintza okerrei aurre egiteko moduak bilatzen dituzte etxeko langileek. Saiakera horietako bat da Emakumeak Aurrera Muskizeko kooperatibarena. Lucía López Camacho kolonbiarra 2001ean etorri zen Euskal Herrira eta bere lehen enpleguan astelehenetik larunbatera egiten zuen lan, interna moduan, kontraturik gabe. 2012an beste bost emakumerekin batera sortu zuen kooperatiba. Lana egiteko modua aldatu zaie: “Familiarekin negoziatzen duzu, aurrez aurre, ez naiz etxea garbitzen uzteko eskatzera etorri naizen neska”. Zerbitzuen truke kontratua egiten dute. Familia ez badago pozik emandako zerbitzuarekin, nahikoa du hamabost egun lehenago ohartaraztea eta kontratua eteten da. Gauza bera kooperatibako langilea ez badago gustura. Astegunetan orduko 12 euro kobratzen dute eta asteburuetan eta gauetan 15 euro.

Biltzarraren berri eta bi langileen testigantzak El Diagonal agerkaritik jasoak izan dira. Lotura honetan duzue jatorrizko artikulua gaztelaniaz.