Bi webgune berri

2007-03-04  //  Sailkatu gabea  //  Iruzkinik ez

Azken egun hautean bi webgune topatu ditut. Biak berriak eta biak nolabait lotuta blog honen gaiarekin.

– Lehena da lana euskalduntzeko bloga. Bloga Emunek kudeatzen du, baina lan mundua euskalduntzearen ikuspegi orokorra eman nahi du. Nahiko interesantea ematen du. Nire bloglines-era ekarri dut.

– Bigarrena ebete.org webgunea da. Ez da bloga, web korporatiboa baino. Ebetek erabileraren ontzia bete nahi du, Txepetxen teoria ezagunei erreferentzia eginez. Ebeteren atzean Ttakun elkartean ibilitako Iñaki Eizmendi dabil, gurasoentzat eta irakasleentzat formazio saioak eskaintzeko asmoz.

SL aplikatua

2007-03-02  //  Sailkatu gabea  //  Iruzkin bat

Atzo hasi nintzen Derion, berbalagunean.
Urrian eman nuen izena, baina orain arte erreserben aulkitxoan egon naiz. Pasa den
astean hasi nintzen beroketak egiten eta atzo, berriz, lehen partida.

Bikote bat osatzen dut Jabirekin. Bera ere
derioztarra da. Orain dela bost urte ibili zen Derioko Udal Euskaltegian EGA
mailara arte. Bost urte hauetan euskara herdoildu egin zaio eta ez galtzearren
Berbalagunean eman zuen izena. Bere asmo bakarra euskara ikastea da.

Azkenik, berbalaguna naiz. Orain arte barrutik
ezagutu dut (Derioko lehen dinamizatzailea izan nintzen) eta orain, ostera,
egunerokoan. Ikusiko dugu zelan moldatzen garen. Horrenbeste aldiz egin dut
berba berbalagunez, egitasmo honek dituen onurez, egitasmo honek izan
ditzakeen proiekzioaz. Orain eltzea sutan probatzeko garaia heldu da.
Jarraituko dut informatzen ……. 

Portzierto, gaur atera da argian Lea-Artibaiko berbalagunari buruzko artikulu bat.

Gazteak eta euskara: aisialdia giltzarri (Larrun 106, 2007ko otsaila)

2007-02-27  //  Sailkatu gabea  //  Iruzkinik ez

Azken Larrun aldizkarian “Gazteak eta euskara: aisialdia giltzarri”
izeneko gaia jorratu dute. Hainbat artikulu daude, sarean ere irakurgai. Beraz,
artikuluetatik ateratako esaldiekin hornituko dut post hau.

Beste adin taldeek ere plangintza behar dute 

Lionel Joly, Soziolinguistika Klusterreko
kidea. 

Soziolinguistikaren oinarri teorikoak eta aplikatuak kontuan
hartuta, pentsagarria al da euskara erabiltzea ingurune soziolinguistiko
erdaldun batean, euskaraz oinarrizko gaitasun linguistikoa izanik besterik ez?

Lionel Joly, Soziolinguistika Klusterreko kidea. 

Euskara erabiltzeko esparruak edukitzeak ez du euskara
erabiliko dutenik esan nahi

Olatz Zabaleta, Tafallako euskara teknikaria

Hizkuntzaren eta hizkuntza-komunitatearen bilakaera
autozentratu eta beregaina lortu behar da 

Kike Amonarriz, soziolinguista eta umoregilea 

Gazteak ezin du ingurune erdaldunean errudun sentitu, gaur
egungo gizarteari erreparatuta, erdara ez baita desagertuko Euskal Herrian.
Bideratu beharrekoa euskal gazteriaren diglosia da, euskara ager dadin
erdararen gainetik, baina errealitate eleanitza ukatu gabe

Xabier Paya, bertsolari eta itzultzailea.

Akaso alderantziz galdetu beharko genuke: “Zergatik egiten
dute gazte euskaldun askok euskaraz?”

Dabid Anaut, Bortziriak eta Leitzaldeko
euskara teknikari lanetan aritua, egun Elhuyarren ari da.

Oso mamitsua, bai horixe. Eta helduen
aisialdian eragingo duen euskara plana eta hausnarketa noizko?

Linguanet ikastaroa

2007-02-26  //  Sailkatu gabea  //  Iruzkinik ez

Gaur goizean hasi da Linguanet ikastaroa. Izena eman nuen orain dela bi aste, eta ikusiko dugu ea zelan. Bere garaian Hiznet egin nuen eta behintzat teknikoki asko aldatu da, moodle plataforma erabiltzen dute eta erosoagoa ematen du.

Blog honetan noizbehinka ekarriko ditut Linguanet ikastaroari buruzko ohartxoak.

Homo fabera hausnarketa premian

2007-02-24  //  Sailkatu gabea  //  Iruzkin bat

Atzo irakurri nuen Argia aldizkarian Soziolinguistika Klusterrari buruz atera duten artikulua. Oso interesgarria benetan.

Bi gauza aipatzeko:
– Hiznet-eko lanak zabaltzeko asmoa dute. Bejondeizuela. Oso lan txukun eta interesgarriak daude eta horiek hedatu eta zabaldu beharra dago.
– Txepetxen teorietan sakondu nahi dute Klusterrekoek eta aplikazio praktikoa ere bilatu nahi dute.

Lumak astintzen

2007-02-22  //  Sailkatu gabea  //  Iruzkinik ez

Normalean blog honetan soziolinguistikaz ari bagara ere, oraingo honetan salaketa bat egiteko ere erabili nahi dut. Nire lagun baten kartela zentsuratu egin dute eta hori ez da inola ere onargarria. Horregatik, hemen agertuko da Igotzek egindako kartela.

Gora lumagorri!!!!!!

Wikipedian ere

2007-02-14  //  Sailkatu gabea  //  Iruzkinik ez

Aste honetan euskarazko wikipediaren astea da. Hori dela eta, erabaki dut kontu bat sortzea wikipedian eta soziolinguistikaren inguruko artikulu eta kontzeptuak igotzea.

Gaur sortu dut nire kontua eta lehen artikulua igo. Diglosiari buruzkoa da. Aurretik beste batzuk ere igo ditut (soziolinguistika, hizkuntza soziologia, hizkuntza komunitatea, …). Wikipedia elkarlanean oinarritzen denez, hemendik animatu nahi ditut guztiak artikuluak igotzera eta daudenak hobetzera.

EGUNERAKETA:

Hiru urte pasa ostean, panorama aldatu da eta artikulu gehiago daude euskarazko wikipedian soziolinguistikari buruz (eta lehendik zeuden batzuk osatuago daude): soziolinguistika kategoria euskarazko wikipedian. Oraindik, dena den, gehiago osatu beharko lirateke.

Gure indigenak (II)

2007-02-09  //  Sailkatu gabea  //  7 iruzkin

Gaurko Berrian Fredi Paiak oso artikulu interesgarria idatzi du.

Hona hemen:

Fredi Paia

Gure indigenak (II)

ai Andres, Andres….tratu da tratu, behiak ez badeko esnerik, kafe hartu!
Urritik egunero nabil gure eskualdeko indigenei grabazioak egiten.
Hilabete batzuk igaro dira eta etorkizunera begira buruan dudan
azterketa sakona egiteko lehenengo fasea den informazio bilketa
amaitzeko oraindino aurretik lan handia dudan arren, badira lehenengo
unetik nabarmenak eta komunak diren zenbait ezaugarri.

La abuela no sabe euskera, sólo chapurrea. Transmisio
haustura sano argia da gure herrian frankismoan. Seme alabek eskolan
erdara ikasi eta guraso euskaldunei erdaraz hasi zitzaizkien.
Eskolatuak izateak gurasoen jakintza autoritatea mespretxatzera eraman
zituen, etxe barruko hizkuntza aldatzeraino. Gero ikastoletara bidali
dituzte euren seme-alabak eta aitite-amamei sinetsarazi hori dela
euskara eta ez ehunka urtetan gure herrian egin dena.

Neuk txarto eiteot, telebisinokoa bai polite. Gure
eskualdeko euskalduna bigarren mailako euskalduna da. Euskara ofizialak
ez dauka zerikusirik gurasoek irakatsi ziotenarekin. Hiztunaren
autoestiman oso golpe gogorra da, mendebaldeko euskararen transmisio
eta ondorioz erabileran eragin katastrofikoa duena.

Gurea geugaz akabe da. Bertoko euskalkia bizimodu
preindustrialari guztiz lotuta ulertzen dute hiztun zaharrek.
Seme-alabak mundu berriaren parte dira, eta mundu berriak hizkuntza
berria dakar berarekin. Aldaketak onartzen dituzte etsipenez, pentsatu
ere egin barik konforme dauden edo ez. Gerrak barruan sartu zien
beldurra igartzen zaie oraindino edozein kritika sozial edo politikoren
aurrean. Askok uste du euskara laster galduko dela, nekazaritzarekin
batera.

Eta batek ere ez du ulertzen zergatik pasatzen dudan hainbeste denbora eurekin.

Oso artikulu interesgarria. Bi komentario.

Ados nago Fredirekin oro har. Oso ondo laburbildu du mendebaldean (baita  ekialdean ere) euskararen galerak izan dituen faktoreak:
– Familia transmisioa etetea.
– Gutxiagotasun konplexua.
– Antzinako munduarekin lotuta dago euskara, ez du balio.
– Eta errepresioa, zelan ez.

Txorierrin ere Uribe Kostan  gertatu denaren antzekoa gertatu da. Agian ez horren gogor. Izan ere, gune euskaldun trinkotuagoak daude Txorierrin (Lezama, Larrabetzu, Loiuko zenbait auzo, Erandio Goikoa). Mungialdearekin ere harreman handiagoak daude. Baina Derion egoera oso antzekoa da. Ez dira azken mohikanoak, baina ia-ia.

Bat 61

2007-02-08  //  Sailkatu gabea  //  Iruzkinik ez

Bat 61: Unibertsitate mailako soziolinguistikaren irakaskuntza.

Zenbaki honek ez dauka komentatzeko askorik. Oso interesgarria da egin duten bilduma, behar-beharrezkoa. Baina nik baino hobeto egin du zenbakiaren laburpena Maria Jose Azurmendik eta horretara jo beharko duzue argibide gehiagoren bila.

Beste kontu bat: Bat aldizkariak osorik jartzen dituzte sarean argitaratu eta urtebetera gutxi gorabehera. Baina oraingo honetan (ez dakit lehen aldia den) zenbaki berriaren laburpenak jarri dituzte. Eskerrik asko Bat aldizkarikoei ezagutza partekatzeko egiten duten ahaleginagatik.

Nola euskalduntzen da lan mundua?

2007-02-08  //  Sailkatu gabea  //  Iruzkin bat

Galdetu.com-en ikusi dut gaur goizean honako galdera hau: Nola euskalduntzen da lan mundua? Erantzuteko ez da erraza, eta gainera, ez dut uste zerbitzu horretarako galdera aproposa denik.

Dena den, baten batek erantzuten badu, giltzarria emango liguke eta santogriala aurkitu. Benga ba, deskubritu dezagun atlantida denok batera.