Ashraf Fayadh erailtzeko hamar poema: zoga

Atalak: Bizitza, Heriotza, Literatura

Argazki honek zirrara ikaragarria sorrarazten dit beti. Potret klandestinoa. Barren artean leiho batetik egina. Patioan emakume bat, belauniko. Alboan gizon borreroa, zutik. Hondoan beste gizon baten prakak, militar edo guardia batenak. Emakumearen lepoa biluzik, ezpata kolpea jaso zain. Justizia. Jainkoaren eskua. Saudi Arabia.

Hiltzera zigortua izateko auzi ezberdin daude Estatu teokratiko eta patriarkal horretan: erailketa, bahiketa, droga-trafikoa, adulterioa, homosexualitatea, sorginkeria, apostasia, arnegua, juramentua, bertzeak bertze. Emaitza: burua moztu edo lepotik heldu edo fusilamendua. Ezpata, urka, su-arma: humanoek ezagutzen ez dugun jainko baten tresnak. “Killing in the Name of Justice”, “Justiziaren izenean erailtzea” da Amnistia Internazionalaren txosten baten izenburua, non salatzen den herio-zigor saudiarabiarra. Oinarririk eta berme prozesalik ez, aurten gutxienez 151 lagun izan dira erailak gaurdaino. 1985etik kasik erailen erdia atzerritarrak izan dira. Ashraf Fayadhen kasua ez da salbuespena, bera palestinarra baita.

Zuzentzaren izenean hiltzea, jainko baten izenean asasinatzea. Fayadhen zortzigarren poema euskaratuak dioenez, “profetak erretiratu dira”, eta ez dira zuregana itzuliko petrolio-mortu horretan, bereziki dirurik gabeko erbesteratua zarenean, jainko xenofobo baten seme edo alaba borta zarenean.

–     8     –

profetak erretiratu dira

beraz ez egon zurea zuregana noiz etorriko zain

eta zuri,

zuri monitoreek beren eguneroko txostenak ekartzen dizkizute

eta beren soldata altuak jasotzen dituzte ..

dirua bai garrantzitsua

duintasun-bizitza batean

* These verses appeared in Fayadh’s poetry collection Instructions Within which was published by the Beirut-based Dar al-Farabi in 2008 and later banned from distribution in Saudi Arabia. Poem translated in English by Mona Kareem.