Belfasteko zamaketarien ikasbidea

Atalak: Komuna, Kultura, Kultura prekarioa

Belfasteko udaletxeko beirate batean 1907an portuko zamaketariek eginiko grebaren irudikapena daukagu ikusgai. Jendetzarekin nahasturik Jim Larkin ekintzailearen silueta beha dezakegu. James Connolly kidearekin batera, bera aitzindaria izan zen sindikalismo irlandarrean. Beirate horretan grebaren urtea oroitzen da eta OBU laburdura ere bai: “One Big Union”, “Sindikatu Handi Bat” edo “Batasun Handi Bat”, Larkinek erabilitako ikurritza, Internazionalaren tradiziotik. Beirazko irudikapen horretan NDUL hitza ere agertzen zaigu: “National Union of Dock Labourers”, “Portuko Langileen Sindikatu Nazionala”.

Portuko zamaketariekin orgariak, ikatz-soinkariak eta tabako-saltzaileak bat etorri ziren lanuzte hartan. Langileria osoa batu zen aldarrikapen hartan. Izan ere, beheko aldean hurrengoa irakur dezakegu:

“Not as Catholics or Protestants,

not as Nationalists or Unionists,

but as Belfast workers standing together”.

“Katoliko edo protestante gisa ez,

nazionalista edo unionista gisa ez,

bat eginik Belfasteko langileen gisara baizik”.

Beirate hunkigarri hau John McLaughlin artistak diseinatu zuen eta Calderwood Glass Ltd. enpresak sortu. 2007an kokatu zuten udaletxean, greba egin zeneko mendeurrena ospa zedin. Norbaitek imajina al dezake egungo udaletxe hurbil bat, non beirate batek edo artelan batzuek greba bat oroitarazi duten? Norbaitek irudika al ditzake langileriari omenaldi artistikoak udaletxeetan gaur? Luzez eta biziki “gerra kulturalez” mintzatzen da, baina gero nehor ez da gai faxismoaren monumentuak botatzeko eta klase-borrokaren oroigarriak sustatzeko. Halaxe da inposatu diguten iruditegi normalizatu eta naturala herria ez den herri honetan.