Brecht Chaplinekin barre-algaraka aro hitsotan

Atalak: Faxismoa

 
McCarthy senatariak agindutako itaunketen eta atxiloketen garaitik Ruth Berlauk Bertolt Brechten eta Charles Chaplinen arteko solasak gogoratzen zituen. Komunismoaren kontrako sorgin-ehizan lagun susmagarrien aurkako jazarpenen unerik larrienean, barre egiteko zioak aurkitu zituzten biok.

Behin istorio bat asmatu zuten. Amerika uztear, Chaplin itsasontzi batean eserita zegoelarik, migrazio-funtzionarioak agertu ziren, goitik behera ikuskatuz eta galdetuz, segurtasunerako arriskua izanen balitz bezala. Alta, ez zuen inork ulertu erantzunetan Chaplinek erabilitako hizkuntza. Hasieran itzultzaile txinatar bat deitu zuten, gero japoniar bat, geroago korear bat eta hainbat itzultzailerekin saiatu ondoren, ez zuten emaitzarik izan.

Guztiek porrot egin zuten beharrez, Chaplinek berak sorturiko hizkuntzan egiten baitzuen berba. Bukaeran, Chaplinek imajinatu zuen eran, agenteek eta funtzionarioek amore emanik, itsasontziak portutik alde egin zuen, askatasunaren jainkosaren begi-keinua argizulo batetik aktoreak zekusalarik.

Berlau, Brecht eta Chaplinek barreari eman zioten, sabeleko mina izan arte, Chaplinek istorio osoa eszenifikatu zuenean, McCarthysmoaren salaketek eta saldukeriek inguratuta izan arren. Aro hitsak itzuli diren honetan, non zuhaitzei buruz solas egitea delitu bihurtu den, barre hori bilatu beharko dugu berriro. Apika hizkuntza bat asmatu beharko genuke, ulertzen ez diguten hizkuntza, hobeki elkar ulertzen duguna. Ruth Berlauk ulertuko luke.