Pertsonen eta gauzen konpontzailea

Atalak: Emakumeak

Unibertsoko energia sendabelar bezala erabiltzen duen emakume harrigarria gaurkoan: Dipti, reiki osatzailea.

Diptik magia egiten du meditazio, bisualizazio eta energiaren bidez, jendea sendatzen du. Baina ez zaio gustatzen sorgina dela esatea, reikia «gutxi aztertutako zientzia» dela dio, eta edonork ikasi dezakeela. Eszeptikoek facebook-era alde egin aurretik, hona hemen bere hitzak.

 Zer da reikia?

Energia bidez sendatzeko teknika japoniarra da, antzinatik erabiltzen dena. Maila fisikoan, psikologikoan eta espiritualean eragiten du. Bizidunei edo bizigabeei eman dakieke reikia. Gainera, eskarmentu handia lortzen denean, gaixoa ukitu edo ikusi gabe ere artatu daiteke. Nik, hemen eserita nagoela, edonor edonon sendatu dezaket. Magia zuria da reikia, helburu positiboetarako bakarrik erabil baitaiteke.

Nola erabiltzen da?

Energia unibertsala gaixoarengana kanalizatuz. Laguntza behar duenaren energiak neurtzen ditut, nolako jarioa duten ikusi edo blokeoak dauden, horren arabera energia transmititzen dut. Ez da erraza esplikatzea, lan oso intuitiboa delako. Nik gauza asko nabaritzen ditut pertsona bat ikusten dudanean. Sentitzen ditut haurtzaroko minak edo etorkizunerako beldurrak, nahasmenak… Badira pazienteengandik irudiak edo soinuak jasotzeko gaitasuna duten sendatzaileak ere. Nik senarekin lan egiten dut.

Zein izan da gertatu zaizun esperientzia gogorrena?

Duela gutxi lagun batek bere lehengusu bati reikia emateko eskatu zidan, minbiziak jota zegoelako. Bere argazkia eta izena eman zizkidan eta energia bidaltzen hasi nintzen. Baina ez zuen jasotzen, errefusatu egiten zuen. Lagunari esan nion, ezin nuela ezer egin. Egun gutxi barru hil zen lehengusua.

Beste behin, 2006ko udaberrian, Pramod Mahajan politikari indiarrari tiro egin zioten. Bizirik eraman zuten ospitalera. Eta bere ilobak osabarentzat reikia eskatu zidan baina energia kanalak itxita zituen; hil egingo zela ikusi nuen eta, zoritxarrez, hala izan zen. Hamairu egun geroago hil zen.

Bizipen onak ere izan ditut. Behin gertatu zitzaigun automobila matxuratu eta baso baten erdian ez atzera ez aurrera gelditu ginela. Herri urbilena autoz bi ordura zegoen, eta ez genuen jan-edanik. Hiru ordu eman genituen autoa martxan jarri nahian, alferrik. Orduan reikia ikasten hasiberria nintzen eta azkenean autoari reikia ematen saiatuko nintzela esan nuen. Esan eta egin. Autoari energia eman nion, laguntza lor genezakeen nonbaitera iristeko. Bukatu eta berehala kontaktuari eman eta abian jarri ginen, egin genuen bi orduko bidea eta iritsi ginen herrira arazo gabe. Eta justu festa bat ospatzen ari ziren etxe baten atarian autoak pott egin zuen. Familiak ostatu eman zigun eta kotxea garabiak eraman zuen handik egun batzuetara.

Gauza bizigabeek ere energia jasotzen dute beraz?

Jakina. Hara, gure etxeko adibidea kontatuko dizut. Gure amak ezin ditu etxeko lanak musikarik gabe egin baina irratia ez dabilkio ondo. Hortaz, goizero, transistorearen parean jartzen da ama ordu erdiz, eta meditazio bidez energia ematen dio. Horrela kargatzen du irratia eta etxeko lanak egiteko musika ondo ematen dio.

Objektuekin tratatzen ari naizenean edo lekuetako energia eta feng shui-a neurtzen, konexio bat garatzen saiatzen naiz gauzekin, elkarrizketa bat izaten bezala. Nik gauzen edo lekuen bibrazioak sentitu behar ditut eta euren egoeraren berri ematen didate.

Amagandik ikasi al zenuen?

Gure amak oinarrizko ezagutza bakarrik du. Ni duela hamar urte hasi nintzen ikasten, lagun batekin. Hemezortzi urte nituen eta nire burua sendatu beharra nuela konturatu nintzen. Oso urduria eta ipurterrea nintzen, hilabetero gaisorik egoten nintzen. Reikiarekin sendatu nintzen eta nire burua artatzen ikasi nuen berehala. Gaitasun berezia nuela ikusi nuen.

 Eta nola igartzen dituzu energiak pertsonekin lan egiten duzunean?

Praktikarekin lortzen den zerbait da, eskarmentua hartu ahala automatikoki hasten zara energia mezuak jasotzen. Gaixo bat tratatzen ari naizenean eskuetan energiaren jarioa igartzen hasten naiz, jario hori gehienetan epeltasun bezala agertzen da. Batzuetan energia hain da bizia nire eskuak erretzen hasten zaizkidala, izerditan. Horrek jario eta ontze indartsua erakusten du. Hori gertatzen da gorputzaren sakonean errotutako blokeoak sendatzen hasten direnean. Energia beharrezko puntuetara eramaten saiatzen naiz ni, eta chakrak orekatzen, hauek baitira gorputzeko zazpi energia gune garrantzitsuenak. Horrekin batera mantrak, meditazioa, reiki sinboloak eta bisualizazioak egiten ditut artatzen ari naizena sendatzeko.

Reikiak gorputza eta aura indartzen du, autokonfidantza eman, psikologikoki oso lagungarria da eta nork bere burua ezagutzen laguntzen du. Gaur egun, minbiziaren aurkako tratamenduan dagoen jende gero eta gehiagok hartzen du reikia.

• Etxekolanak

Geure burua babesten laguntzeko meditazio ariketa bat poposatu dit Diptik. Argi zuriaren meditazioa edonork egiteko modukoa omen da, «oso erabilgarria geure burua indartzeko eta erlaxatzeko. Berehalako onura ekartzen du».

Egunaren amaiaren edo jende askoren artean egon ondoren egiteko aproposa da, etzanda edo zuzen eserita egin daiteke. Musika erlaxagarria jarri eta argi zuri indartsu bat zure burua argiztatzen hasi dela irudikatu behar duzu. Burutik behera imajinatu behar da argia, gorputz atal guztiak pasatuz, burua, ilea, buru-hezurra, burmuina, belarriak… eta horrela oinak argitu arte. Zure burua argizko burbuila baten barruan irudikatu behar duzu azkenik. Argi bainua hartu eta ondoren, gutxika argia joaten hasiko da, lehendabizi oinetatik eta burutik azkena.