Euskararen egunak

2011-12-02  //  Sutondoko kontuak  //  Iruzkinik ez

Atzo honako artikulua idatzi nuen zuzeu-n. Gaur Petra Elserren irrati zutabea entzun ondoren, gauzak lehen bezain argi (edo ilun) ikusten ditut.

Hasiera batean egun bat izan zen (abenduak 3), gaur egun gero eta gehiago dira euskararen egunak (astebetekoak dira ospakizunak Txorierrin behintzat). Orain bota beharko nuke topikoen parrastada bat: egun guztiak dira niretzat euskararen eguna, pozik izango naiz ospatzen ez den urtean, elbarritu fisiko eta mentalen eguna ere bada abenduaren 3a, eta abar.

Baina ez ditut horiek esango. Isilduko naiz. Gainera, abenduaren 4an euskal kulturaren festa eta peregrinazioa ere hasiko da Durangon. Gure meka txikia. Eta topikoen zaparrada horretarako ere guardasol barik: egutegiak eta sukalde liburuak salduenak, gero eta erdarazko liburu gehiago dago, ez dago eskubiderik Hirukoekin egin dutena egiteko, manifestodromoa topera, lagun zaharrak, erromeria, …

Baina horiek ere ez ditut esango. Eta txarrena da batean zein bestean parte hartu egingo dudala. Eta ez dakit zergatik.

Atzo Bilblogarin

2011-12-01  //  Sailkatu gabea  //  Iruzkin bat

Bilblogari izeneko lehiaketa izan da Bilbon, blogen ingurukoa. Aurkeztea erabaki nuen, 34 urterekin leku gutxitan gazte bezala agertu ahal zarelako. Aurkeztu eta irabazi. 300 euro. Eta pozik.

Blogarekin jarraitzeko beste arrazoi bat. Mila esker nontzeberrikoei eta epaimahaikideei.

Subsidiarietatea

2011-11-28  //  Sailkatu gabea  //  Iruzkinik ez

Gaztelaniazko wikipediaren arabera, subsidiaritate printzipioa hauxe da: subsidiarietate printzipioak, bere definiziorik zabalenean, xedatzen du arazoaren objektutik hurren dagoen agintariak (arau bidezkoak, politikoak edo ekonomikoak) erabaki behar duela gai oro .

Printzipio hau ere sarritan erabiltzen da soziolinguistikan, batez ere hizkuntza ekologiari lotuta. Eta hauxe da gutxi gorabehera: bertako hizkuntza batek egin dezakeen oro, ez luke egin behar hizkuntza
globalago batek.

Printzipio honek indar eta ibilbide oparoa izan dezakeela uste dut. Hala bedi!

25 azatz euskarazko kulturgintzaren soloan

2011-11-24  //  Azatzak  //  Iruzkinik ez

Lehenago zuzeun eta sustatun argitaratu dut, baina gaur blogera ere badakart.

Orain dela urtebete hasi nintzen Garaigoikoa
blogean hilean birritan (gutxi gorabehera) azatzak batzen. Eta zer dira
azatzak ba? Hiztegian begiratuta, azatzak dira haziak non bota diren
gogoratzeko jartzen diren seinaletxoak. Gure kasuan euskarazko
kulturgintzaren lagin txiki bat izan gura dute.

Urtebetean
batu ditudan 25 azatz hauek euskarari zentralitatea ematen duten
euskarazko kultur jarduerak dira. Eta zergatik zentralitatea eman
euskarari? Ba, txosten honen arabera,
euskararen garapenerako gakoak izan diren kultur jarduerak euskarari
erdigunea eman diotenak izan direlako. Eta bide horretan neure harritxoa
jarri gura nuelako.

Datorren urtean ere, jarraitu gura dut azatzak batzen, ea posible den beste 25 batzea eta 2013rako 50 azatz batuta izan.

Orain arteko azatzak:

-Azatzak 1: 111 akademia

-Azatzak 2: Eztena fanzinea

-Azatzak 3: Korrika kulturala

–Azatzak 4: Armiarma.com

-Azatzak 5: Azpitituluak.com

–Azatzak 6: Iparra-hegoa

–Azatzak 7: Laburbira

–Azatzak 8: ekaitzaldia badok

–Azatzak 9: irakurri, gozatu eta oparitu

-Azatzak 10: eskola txikiak

–Azatzak 11: literaturia

-Azatzak 12: Euskal Herria Zuzenean

–Azatzak 13: Euskal kulturgintzaren transmisioa

–Azatzak 14: Kukutza gaztetxea

–Azatzak 15: EHAZE

–Azatzak 16: Xamarrenak

–Azatzak 17: Auspoa

–Azatzak 18: Herri musikaren txokoa

–Azatzak 19: Arratsaldekoa eta arratsean

–Azatzak 20: Hitzen uberan

–Azatzak 21: Irrien lagunak

–Azatzak 22: Bertsolari

–Azatzak 23: Luma aldizkaria

–Azatzak 24: Gartxot

–Azatzak 25: Lekeitioko zinema eta bideo bilera

Azatzak 25: Lekeitioko zinema eta bideo bilera

2011-11-16  //  Azatzak  //  Iruzkinik ez

25 azatz dagoeneko. Orain dela urtebete inguru hasi nintzen azatzak batzen eta 25. etorri da konturatu orduko.

Oraingo honetan Lekeitiora goaz. Euskarazko zinema azken aldi honetan loratze bat ari da bizitzen, baina urteetan basamortua izan da euskara zinematan. Hala ere, urtero-urtero Lekeition egin da zinema eta bideo bilera.

Aurtengoa 34. zinema eta bideo bilera izango da. Euskaraz filmatutako dokumentalak eta film laburrak izango dira Lekeition ikusgai, azaroaren 28tik aurrera. Egitarau oparoa apailatu dute aurten ere.

Azatzak 24: Gartxot

2011-11-14  //  Azatzak  //  3 iruzkin

Azatzik azatz jarraitzen dugu azaroan. Eta oraingoan ekialdera joko dugu, baina mendebaldetik datorren oihartzunak hara eramanda.

Galizia aldeko Sechu Senderen bidez jakin dugu Gartxot izeneko ekimenaren berri. Animaziozko filma egiten ari dira egin dute Zaraitzu aldean. Datorren hilean estreinatuko ei da filma. Ostiral honetan estreinatuko dute Euskal Herriko zinema aretoetan.

Baina, horretaz gain, bestelako ekimen batzuk ere jarri nahi dituzte martxan: Gartxot bidea eta abar.

Gartxot trailerra from Somuga on Vimeo.

Eguneraketa: filma amaitu dute eta ostiral honetan estreinatuko dute. Ikusteko irrikatan gaude. Aupa Gartxot!

Bost

2011-11-09  //  Sailkatu gabea  //  2 iruzkin

Bost urte zaharrago gara gaur. Bost urte. Nork esan behar zidan niri? Bost urte eta artikulu asko, askooo, askoooo. Eta etorriko direnak. Etortzen badira, jakina.

Izan linguistikoki iraunkor

2011-11-08  //  Sailkatu gabea  //  Iruzkinik ez

Orain dela gutxi, Kutxak eratutako berde-berdea webgunean “aurkitu” nuen
hizkuntza ekologia dibulgatzeko bideo eta ikastunitatea. Gaur, berriz, Rober Gutierrezen twitter kontuaren bidez “aurkitu” dut hizkuntza ekologia sustatzeko kanpaina hau. Momentuz bi bideo eman dituzte argitara (euskarazko azpitituluekin gainera).

Horrekin batera, Galizia aldean “aurkitu” dudan beste material batekin oroitu nintzen. Hizkuntza izatea ez da erraza. Kasu honetan ere, hizkuntza aniztasuna eta munduko hizkuntzen egoera du hizpide.

Eta, amaitzeko, ostegun honetan Topaguneko Mikel Ozaitak Bilbon Hizkuntza ekologiaren paradigmaren gaineko bi ordutako ikastaroa emango du.

Izan linguistikoki iraunkor!

Proposamenak egin

2011-11-04  //  Sailkatu gabea  //  Iruzkinik ez

Datorren otsailean Klusterrekoek V. soziolinguistika jardunaldia egingo dute. Horren aurretik, proposamenak egiteko aukera ireki dute. Hona hemen euren webguneak dakarrena:

Azatzak 23: Luma aldizkaria

2011-11-03  //  Azatzak  //  Iruzkinik ez

23. azatza botako dugu gaurkoan. Nork esan behar zidan niri! Eta oraingoan aldizkari bati buruzkoa da.

Luma aldizkariak urtetxo batzuk baditu dagoeneko. Euskarazko hitz jolasak egiten dituen lehen aldizkaria da (eta momentuz bakarra). Aldizkari txukuna, baina zailtasunak bizi izan dituena. Eta interneten presentzia eskastxoa duena.

Gainera, orain dela bost urtetik, Euskal Herriko Hitz Gurutzatuen Txapelketa antolatzen du. Azaroaren 26an izango da Irunen, ohikoa den moduan.