Lizentzia libreak, euskal hedabideen etxea eraikitzeko tresna

2021-09-16  //  Elkarlanak, Komunitatea  //  Iruzkinik ez

Iskanbila sortu da Twitterren aste honetan, ARGIAk berrerabili egin duelako Aiurri hedabideak argitaratutako elkarrizketa bat, Creative Commons Aitortu – Berdin partekatu lizentzia baliatuz. Sare sozialak ez dira ingurune onena mota honetako gaiei buruz eztabaidatzeko eta horregatik argitaratu nahi du auzi horri buruzko irakurketa hau ARGIAko lantaldeak, sareen logika polarizatzailetik harago, jarrera eraikitzaileak nagusitu daitezen. (gehiago…)

Denboraren makina ez da gelditzen

2021-09-09  //  Sailkatu gabea  //  Iruzkinik ez

[Itsaso Zubiria Etxeberria] Hamabost urte daramatza martxan eta jarraitzeko indartsu ikusten dute ARGIAn. Sailez sail ari dira astekariaren balorazioa egiten, jabetuta aktualitatearen erritmoak eramanda sarri hausnarketa pausatuagoak bigarren maila batean geratzen direla. Atal bakoitza sakon aztertzeko tartea hartzen hasiak dira erredakzioan eta aldaketa batzuk ere iritsi dira horren ondorioz. Azala, Beranduegi edo asteko argazkiaren balorazioak azalduta ditugu lehenago espazio honetan. Gaur ‘Denboraren makina’-ren tartea da.

“Freskotasuna” azpimarratu dute. Artikulua bitxikeria batetik abiatzen da, Nagore Irazustabarrenak amua jartzen dio irakurleari eta behin sarean harrapatuta, zeharka sartzen dizkizu beste balore batzuk. Izan daiteke oso historia zahar bat zeharka kontatzen dizuna gaur egungo arazo bat edo balore batzuk.

Balorazioa egiteko hiru irizpide hartu dira kontuan: garaia, tokia eta gaia. Ez dira hamabost urteak aztertu, azken urtebetea ari dira analizatzen sail guztien kasuan. ‘Denboraren makina’ garaietan orekatuta ibili dela ondorioztatu da. Alegia, aro edo aldi guztiak landu direla nahiko antzera. “Aurten akaso Erdi Aroa geratu da gutxixeago landuta, baina orokorrean nahiko orekatuta ikusi dugu”, azaldu digute erredakzio taldetik. Gaiak ere denetarikoak eskaini zaizkio atal honetan irakurleari.

Euskal herriko gaiak: historia idatzi gabeak

Neurtu da, kasu honetan, zenbat artikulu diren Euskal Herrian kokatzen direnak, zenbat nazioartekoak, eta honen barruan ere Europa edo Mendebaldearen ikusgarritasuna eta besteena zenbateraino dagoen orekan. Euskal Herriko gaietan dago aldea. “Ez da erraza izaten gure herriari lotutako estilo honetako historia eta bitxikeriak topatzea”, azaldu du atalaren koordinatzaileak. Herri zapaldu baten arazoak. Historia idatzi gabeak. “Hilero elkartzen gara hurrengo lauzpabost asteak antolatzeko eta helburu bezala jartzen dugu gutxienez hilean behin sartu behar dugula Euskal Herriari lotutako gairen bat, horrela bermatzeko gutxieneko bat”, jarraitu du.

Arazoak arazo, gustura dago lantaldea astekariko sail finko honekin eta beste puska baterako makinak martxan jarraituko du.

Ekonomiaren jokaldiak irakurtzen irakatsi digu

2021-09-01  //  Sailkatu gabea  //  Iruzkinik ez

[Itsaso Zubiria Etxeberria] Mamira jo behar dut 80 urteko historia oso baten zati txiki baten lau pintzelada ondo azaldu nahi baditut. Hainbeste dago kontatzeko. Juan Mari Arregi ‘Daniel Udalaitz’ agurtzea tokatu zait. Eskertzea hogeita bost urtez astekari honetan irakurleari sozioekonomia gaiez emandakoa. Erreleboa emateko garaia heldu dela eta ez duzu gehiago ‘Talaian’ zutabean bere testurik irakurri ahal izanen, irakurle.

Egin egunkariaren sortzaileetakoa 1977an, ekonomia gaiez arduratu zen frankismo ondorengo urte korapilatsu haietan. Petrolioaren lehen krisiak kolpatutako industria haserretu baten aurrean zeuden, langileen grebak eta martxak, protestak, poliziaren errepresioa, Francoren heriotza, gatazka politikoa… urte haietan izan zen Bizkaiko delegatua eta ‘Laboral’ izeneko sekzioaren arduradunetako bat. (gehiago…)

Gazteak badatoz bultzaka

2021-07-23  //  Sailkatu gabea  //  Iruzkinik ez

Uztailaren 16an Zumaiako gaztetxean egin zuten ARGIAko bazkideek batzarra. Lehen aldiz hartu zuten bertan parte bost bazkide berriek. Argazkia: Dani Blanco.

[Itsaso Zubiria Etxeberria] Bazkide batzarra egin berri da ARGIAn. Langileena baita enpresa, gogoratu. Bost bazkide berri aurkeztu dituzte bertan. Eneritz Arzallus, Amaia Lekunberri, Jenofa Berhokoirigoin, Maitane Gartziandia eta Zigor Olabarria. Taldera batu diren azken lagunekin hitz egin dugu ikasturteko azken zenbaki honetan, zergatik egin diren bazkide, nola sentitu diren beraien lehen bazkide batzarrean…

Kazetari zein diseinatzaile izan, orain arte jaso duten ARGIAren ikuspegia aldatuko zaie bost bazkide berri hauei hemendik aurrera. “Proiektuaren ikuspegi integralagoa” izango dutela diote. Bazkide egin arteko harremana gehiago izan da soldatapeko lan baten antzekoagoa, baina lehen batzar horrek dagoeneko murgildu ditu enpresa baten hesteetan. “Zuzendaritzatik urtean behin langile guztiei balantze ekonomikoa azaltzen zaien arren, hau beste gauza bat da; diru-kontuez hitz egiten da, erabakiak hartu behar dira, langileon esku (hemendik aurrera gu barne) dago enpresaren norabidea markatuko duten erabakiak hartzea”, dio batek. “Kazetaritza proiektu baten atzean dagoen lan guztia ezagutzeko aukera dugu orain, eta ARGIA proiektuaren etorkizuna markatuko duten erabakietan hitza eta bozka”, segi du beste batek.
Epe luzerako ikusten dute beren burua ARGIAn. Ezagutu dute zein den etxe honetan lan egiteko modua, zein diren zuhaitza sustraitzen duten baloreak, zein den norabidea eta zeintzuk helburuak. Eta proiektuan sinetsita egin dira bazkide. “Soldata igoera bat izango dugu, lantaldeetan parte hartzeko ardura batzuk eta abar, baina niretzat garrantzitsuagoa da sentitzea talde baten parte zarela, talde horrek proiektu bat atera behar duela aurrera eta modurik egokiena da partaide guztiok baldintza berdinetan jokatzea partida”, azpimarratu du hirugarren batek.

Prozesu natural baten fruitu dira inkorporazio berri hauek. ARGIAn inor ez da bazkide egiten lehen unean. Ez da proba gogorrik edo baldintza berezirik bete behar ere. Lanean hasi, taldea ezagutu, lan egiteko moduak ikusi, eta ekipoan denok eroso eta gustura egonez gero, denbora kontua izan ohi da.

Gazteak badatoz atzetik bultzaka. Proiektuak jarraipena izateko beharrezkoa. Zaharrak gustura egoteko moduan dira.

Gakoak 2021: Nor da gure buruen jabe?

2021-07-22  //  Sailkatu gabea  //  Iruzkinik ez

Azalaren irudia: Paula Estevez.

[Itsaso Zubiria Etxeberria] Uste dut inoiz hitz egin dizudala orri honetan lantokiko erosotasunaz, irakurle; nagusi bat gainetik izateak kentzen dizkigun buruhausteez, ardurez. Nahiago dugu besteren mende egon eta haren aginduak bete behar diren lanpostu bat eduki, erabakitzeko aukera eskaintzen diguten beste lantoki batzuetan egon baino. Erosoa? Sarri bai. Sekula ez du usainduko, ordea, buruhausteak buruhauste, askatasunaren lurrin gozorik.

Gure buruen jabeez doa aurtengo Gakoak. Astekaririk gabeko abuztua aseko dizun aldizkari potoloa. ARGIA Jendeak buzoian jasoko du, abuztuaren 8 inguruan. ARGIA Jendea ez denak, Azokan erosita eskuratu dezake. Burujabetzez da aurtengo Gakoak. Pluralean, bai. Urte luzez egon da zabaldua burujabetza bat eta bakarraren ideia bazter hauetan. Utopikoa batzuen iritziz. Baliteke. Gertu ikusten ez dudan arren, lor litekeela sinetsi nahi duen horietakoa naizela onartuko dizut, baina bidean lan asko aurreratu daitezkeenaren ustea ere badut. Ahalik eta arlo gehienetan lortutako burujabetza bakoitzaren baturak emango digulako osotasuna. Zertarako behar dugu burujabetza bat eta bakarra, beste guztiak berdin jarraitzen badu?

Gure buruen jabetza berreskuratzeko emango dizkigute gakoak. Ez da XXI. mendeko formula berri bat. Ez gara mundua “aurkitzen” ari, gu heltzerako hor ari baitziren beste asko. Dauden teoriak eta praktikak ezagutu ahalko dituzu ARGIAren udako argitalpen horretan. Osasun-, zaintza-, finantza-, etxebizitza-, energia- eta abar luze baten burujabetzen ingurukoak. Herri honetan dauden esperientziak jaso dituzte, eta kanpoan ezagutu ditzakegunak. Norabideak. Abiadura Handiko Trenean garamatzaten buru eta jabe guztien errailetatik atera eta patxadaz irakurtzeko gakoak.

Erreportaje luze eta laburrak aurkituko dituzu bertan, burujabetzak ikuspuntuaren oinarri bezala hartuta. Eta ez hori bakarrik: komiki bat, kultur gomendioak edo Euskal Herrian bertan uda giroan (edo ez) egiteko moduko txango proposamenak ere bai.

Mundua azkar doa, baina orain mende bete pasa erabili ziren hitzek oraindik ere aktualak izaten jarraitzen dute: “Mugitzen ez denak ez ditu kateak sentitzen” (Rosa Luxemburg). Kate batetik baino gehiagotatik lotuta gaude eta ez dira denak batean apurtuko; baina kate bat askatzen den bakoitzean mugitu ahal izango gara gehiago.

Burujabetzei eskainitako 2021eko gakoak aldizkarian aurkituko dugu…

Informazio burujabetza: editoriala.

Energia burujabetza: Energia Komunitateak, Hernaniko proiektua, Nafarroako egoera.

Osasun burujabetza: COVID-19an non dira prebentzioa eta iraunkortasuna?

Elikadura burujabetza: Elikagunea, Elkarlaguntza Sarea eta Ekoalde proiektuak.

Zaintza burujabetza: zaintza komunitario esperientziak.

Finantza burujabetza: Olatukoopek sortu duen funts mankomunatua.

Etxebizitza burujabetza: Ankurkulu erabilera-lagapeneko etxebizitza kooperatiba eta hamar urteko okupazio esperientzia.

Teknologia burujabetza: Oñatiko Onaro proiektua; plataformekiko menpekotasunaren ondorioak.

Kultura burujabetza: pandemia bateko txatalak.

eta, horretaz gain…

Komikia: “Etzidamu”, Shukarek egina.

Uraren ibilbibidea: zazpi etapako zeharkaldia Euskal Herrian barna.

Kultur gomendioak: gozatzeko hamabi irakurgai eta hamabi ikusentzunezko.

Lurrak deika darrai

2021-07-14  //  Sailkatu gabea  //  Iruzkinik ez

[Itsaso Zubiria Etxeberria] Ikusi diot bati baino gehiagori soinean kamiseta. Berdexka, arrosagoa, beixa… Gustuko izan du jendeak diseinua. Mezua. Filosofia. “Lurra herriari deika”. Zuzena. Laguntza ekonomiko pixka bat jasotzeko sarri erabili da salmenta estilo hau herri honetan eta funtzionatzen du. Baina lurrak behar du dirua baino zerbait gehiago eta kanpaina ez da bukatu. Ikusi al dituzu azken asteetan argia.eus webgunean zabaldu diren bideoak?

ARGIAk agroekologia mugimenduarekin elkarlanean hasitako ibilbidearen pauso bat gehiago da, ezagutzera emateko Euskal Herrian eredu honen bueltan lanean ari diren hainbat proiektu. Asmoa da erreparatzea mugimendu hau osatzen dutenen artean dagoen aniztasuna. Barietatea lurralde, jende, ukitzen dituzten gaien ikuspegitik. Kazetaritza guztia ez baita berdin, eta nekazaritza guztia ere ez. Bai agroekologiak eta bai Argiak genero harremanak lantzen dituzte, burujabetza dakarten produkzio moduak, langileen eskubideak lantzen dituzte eta ingurumenarekin errespetuan egiten dute lan.

Lau dira dagoeneko publikoari zabaldu zaizkion bideo erreportajeak. Oraindik badira beste batzuk eskuartean, pixkanaka argitaratuko direnak. Hazien merkatuan alternatibak sortzen ari den Aleka elkartea, proiektu txikitzaileen aurka eta nekazaritza txikiaren alde lurrak okupatu eta lantzen dituen Lurraren Orena taldea, behi eta ardien esnekiak ekoitzi eta langileak kontsumitzailea eta ingurumena babestuz produktu osasuntsuak ekoiztea helburu duen Bizkaigane elkartea eta arrautza ekologikoak inguru gertukoan merkaturatzen dituzten Guneko proiektua dira erreportaje serie honetan oraingoz ezagutu ditzakegunak.

Bost-zazpi minutuko iraupena duten ikus-entzunezkoetan proiektu hauen berri izateaz gain, garrantzia eman diote paisaiari. Sarri irudikatu ohi baitugu Euskal Herriko nekazaritza mendi eta belardi berdez inguratutako baserri baten itzulian. Zazpi lurraldeetako paisaien aniztasuna ere oso kontuan hartu da eta irudi zoragarriak bildu dituzte.

ARGIAk sinesten baitu eredu agroekologikoan hasi zuen ibilbide hau mugimenduko kideekin eta ondoen egiten dakiena eginaz jartzen du bere aletxoa: informazioa jaso, forma eman eta zabaldu. Horretan jarraitzeko asmoa dugu.

Sare hau harrapatuta geratzeko modukoa da

2021-07-09  //  Sailkatu gabea  //  Iruzkinik ez

[Itsaso Zubiria Etxeberria] Ekainaren 25ean ospatu da Olatukoop ekonomia sozial eraldatzailearen sa-reak urtero antolatzen duen Saretze Eguna. Laudioko Aiaraldea Ekintzen Fak-toriak bildu ditu aurten gonbidatu guztiak. 750 metro koadroko espazio industrial berritua ezagutzeko aukera izan dute bertan bildutako denek, egunari hasie-ra emateko. Olatukoopeko kide berrien aurkezpena egiteko, lehendik daudenen sentsazioak eta taldearen norabideaz hitz egiteko tartea izan dute espresuki horre-tarako antolatutako egitarauan, eta umo-reak eman dio amaierako gozo puntua.Faktoriak ateak ireki zituela hilabete pasatxo denean antolatu dute Saretze Egun hau. Ezertan hasi aurretik, lekuak berak txunditu ditu Olatukoopeko kide diren proiektu txiki bakoitzeko kideak. Egurrez egokitutako txokoak erakutsi dizkiete Faktoriako lagunek: ekitaldi jendetsuenetarako espazioa, txikiagoe-tarako atondutako aretoak, otorduak eskaini ahal izateko sukaldea, bertara lekualdatu diren Aiaraldeako kooperati-ba, elkarte edo taldeen bulegoak… azken urteetan antzeko bilkuretan modan jarri diren ezagutza jolasen aldean, ez al da jardunaldi batzuen hastapen hau natural eta aberasgarriagoa?

Aurkezpenak eta esperientziak

Ongi etorria egin zaie azken urtean Olatukoopera gehitu diren kide berriei eta aukera ireki zaie beren buruak eta proiektuak aurkezteko. Lehendik dauden kideek hartu dute hitza gero, eskatu baitzaie azaltzeko nola ikusten dituzten beren proiektuak, zer den Olatukoopek ematen diena… Positiboa izan da erantzuna. Gustura daude sarearen babesarekin. Proiektu txikiak dira gehienak eta bakarrik oso irla txiki ikus daitezkeen arren, sare honek irla batetik besterako bideak ireki eta sendoago sentiarazten ditu.

Nora joan nahi dugu?

Hitz potoloegietan sartu gabe, baina Olatukoopen plan estrategikoaz jardun dira. Gako nagusiak aipatu dituzte, etorkizunera begirako helburuak. Zer mundu nahiko luketen amestu eta horra bidean hurrengo pausua zein den diseinatu, hankak lurrean izaten saiatuz.Elkarrekin Faktoriako lagunek pres-tatutako bazkari goxoa dastatu ostean, antzerkiarekin eman diote amaiera egu-nari. Umoretik. Ezjakintasunez eta zalan-tzaz beteta iritsi diren azken hilabete luze hauen aurrean ospatu dute bizitza. Bizi direla, aurrera begira daudela eta sare baten babesa dutela. Gora kopak!

Hemen Olatukoopek egindako egunaren kronika bideoan:

Kazetaritzako lehen pausoak

2021-07-04  //  Sailkatu gabea  //  Iruzkinik ez

[Itsaso Zubiria Etxeberria] Erredakzioan egin dut topo Iraitz Madariaga Etxebarriarekin. Lehen hilabetea du praktikaldian eta hor ari da jo eta su, egunerokotasuneko berri izan daitekeenaren informazioa lortu, kontrastatu, albisteak idatzi, sare sozialetan zabaldu… Hori izango du, laburrean, irailera arteko lana. Kazetaritza ikasketak burutzen ari da unibertsita–tean eta hirugarren mailako lan-praktika du ARGIAkoa. Berarekin aritu naiz pixka bat ikasketez, lanaz, esperientziaz…

Hasiberria da kazetaritza lanetan muturra sartzen. Urtarriletik ekainera bitartean, EHUko NOR Ikerketa taldean aritu da praktiketan, Eusko Jaurlaritzak ikerketa munduan hasi nahi duten gazteei ematen dien Ikasiker bekarekin. Bertan, audientzia ikerketekin eta ikus-entzunezkoen inguruko azterketekin aritu dira lanean, eta hala azaldu du berak: “Idatzizko komunikabide bateko lanarekin zerikusirik ez duen arren, esperientzia aberasgarria izan da hedabideen panorama ulertzen laguntzeko”.

ARGIAn kazetaritza idatzia landu–ko du batez ere lau hilabete hauetan. Beti gustatzen zait elkarrizketa hauetan galdetzea zein gai gustatzen zaien gehien, zerekin sentitzen diren erosoen… eta Iraitzen erantzunekin identifikatu samar sentitu naiz, inguruan beti izaten baititugu gaiak, lanak, norabideak oso garbi dituen jendea; beste batzuk, berriz, noraezean iritziko du zenbaitek, lorez lore ibiltzen garen erleen pare. “Ez daukat gai batekiko lehentasunik. Uste dut gai bat zenbat eta hobeto ezagutu, orduan eta gehiago hurbiltzen zarela harengana, zure egiten duzula”. Arlo asko ukitzen ari da albisteak sortzerakoan eta “oraingoz” politika gaiek erakarri omen dute gehien.

Erredakzio baten egunerokotasunera ohituta amaitu nahiko luke lanaldia irailean: “Erritmoak zein diren ikasi eta dinamikan integratu nahi nuke. Berriei ikuspuntu egokitik heltzen ere ikasi nahi dut, iturriak behar bezala kontrastatzen jakin eta informazio osatua ematen ahalegindu”.

Lasarte-Oriako lantaldean “giro ona” aurkitu duela dio. “Egunero aktualitateaz informazioa kalera–tzeaz gain, kazetari guztiak dira astekaria ere kudeatzen dutenak. Lan karga handia dute eta dinamika oso antolatua topatu dut”, azaldu du.Ongi etorri, Iraitz, eta atera ahalik eta zuku gehien egonaldiari.

(H)asteko argazkia dut gustuko

2021-06-27  //  Sailkatu gabea  //  Iruzkinik ez

EFE/EPA/JON ROWLEY

[Itsaso Zubiria Etxeberria] Duela gutxi jakin dut gure haurtzaroko irakasle batek gustuko duela ARGIA irakurtzea. Horixe duela asteko plazeretako bat. Asteko argazkia omen du gustuko. Besteren artean. Eta egia esan, nik ere atsegin dut atala. Hortik heltzen diot normalean aldizkariari. Indartsuak iruditzen zaizkit irudiak. Aktualak. Nazioarte mailako aldizkarietara eramaten dit burua. Galdetu dut zein den erredakzio-taldean atal honen inguruan egiten den balorazioa eta hona datuak.

Zerrendatu berri dituzte argazki–tan zenbat eta zein herrialde agertu diren sail honetan, zein gairi lotutako irudiak izan diren, protagonista nor izan den, egileak nor izan diren eta testuak nork erredaktatu dituen. Kontent dira emaitzak ikusita, beti izanik hobetzeko zirrikitua. Beranduegi-ren ondotik blogik bisitatuena da asteko argazkiarena.

Bilatzen ahalegintzen dira oreka bat beti, begiak betiko lekuetatik altxa eta protagonismoa merezi duten munduko beste hainbat txokotan fokua jarriz. Nazioarteko irudiak hogeita sei izan dira. Euskal Herrikoak beste hainbeste. Biak biltzen dituztenak hamaika. Eta nazioartean ez dira gehiegi errepikatu herrialdeak. Frantzia dago hiru argazkirekin sailkapen taulan lehen, AEBei bi aldiz eman zaie lekua, eta ondoren dira beste hogeita bat herrialde 2020ko urtarriletik hona espazio hau astebetez osatu dutenak: Israel, Honduras, Espainia, Kanaky, Libano, Ve–nezuela, Hego Sudan, Suitza, Katalunia, Kongo eta beste hainbat.

Koronabirusak izan du protago–nismorik handiena azken urte eta erdian. Hamabost aldiz izan da hizpide atal honetan. Errefuxiatuen gaiak eta euskal presoenak jarraitzen diote zerrendan launa argazkirekin. Feminismoak eta hondakinek jaso dituzte hiruna astekari, eta aniztasun handia dago bat edo bi argazki eman zaizkien gaietan. Etxegabetzeak, kolonia–lismoa, multinazionalak, kalamuaren legalizazioa, antifaxismoa, euskara, kaleko artea eta abar luze bat.

Hogeita bat emakume eta hogeita lau gizon izan dira protagonistak. Biak agertu dira bederatzi argazkitan eta hogeita hamaika izan dira zuriak eta hogeita lau beste arrazetakoak. Dani Blanco da etxeko argazkila–ria eta honenak izan dira zazpi irudi. Beste hainbeste Foku-renak ekarri dira paperera. Baina badira Ekinklik, Ecuador Etxea, Idoia Zabaleta, Unai Beroiz, Jordi Borras, Kauldi Iriondo, Hans Lucas eta beste hainbeste argazkilari. Eta hemen dago hutsunea. Jabetu zara, irakurle? Emakume bakarra dago egileetan. Hori du ARGIAk erronka.

Agur Google, kaixo Matomo: zure pribatutasuna babesteko neurri berriak ARGIAn

2021-06-16  //  Sailkatu gabea  //  6 iruzkin

Gauza jakina da multinazional askok herritarron datuekin negozioa egiten dutela. Horretarako, doan eskaintzen dizkiguten zerbitzuen bidez, batean eta bestean uzten ditugun arrastoak biltzen dituzte etengabe. Gure irakurleen pribatutasuna bermatzeko hiru neurri berri hartu ditugu ARGIAko webgunean.

Bideo honetan laburtuta ikus dezakezu azpian xeheago azaldu duguna.

1- Agur Google Analytics, kaixo Matomo: Webguneen trafikoari buruzko estatistikak eskuratzeko zerbitzua da Google Analytics. Horri esker webguneen kudeatzaileek jakin dezakete internautak noiz sartzen diren beren orrietan, zein gailutatik, non egiten duten klik, zenbat denbora igarotzen duten, non dauden eta abar. Oso orokortua da zerbitzu honen erabilera munduan, baita Euskal Herriko hedabideetan ere. Herritarrek jakin ez arren, Eusko Jaurlaritzak berak ere, 2014an euskarazko hedabide guztiak behartu gintuen zerbitzu hau instalatzera gure webguneetan, eta beraz, esan dezakegu euskarazko hedabideetan dabiltzan euskaldunen datu oso xeheak jasotzen ari dela egunero Google.

ARGIA egiten dugunok ez dugu akritiko jokatu nahi gure datuak salduz negozioa egiten dutenekin. Horregatik, Google Analytics kendu egin dugu ARGIAko webgunetik. Horren partez, Matomo software librea instalatu dugu gure zerbitzarian eta oso pozik gaude. Orain, gure trafikoaren datuak hobeto aztertzeaz gain, gure irakurleen erabateko pribatutasuna bermatuko dugu, datu anonimo horiek ARGIAren zerbitzarietan utziz, eta ez multinazional baten esku.

2- Sare sozialen botoiak kendu ditugu. “Atsegin dut” edo “partekatu” gisako botoiek, nahiz eta irakurleak ez sakatu, herritarren datuak jaso eta Facebook, Twitter eta enparauen zerbitzarietara bidaltzen dituzte. Informazioa partekatzeko erraztasunaren izenean, ez zaigu onargarria iruditzen ordain-sari hori. Beraz, ARGIAko informatikariak espreski garatutako botoi propioak instalatu ditugu horien ordez. Orain sare sozialetako enpresek ez dute ARGIAko irakurleen daturik inoren baimenik gabe jasoko.

3- Adi cookie-politika onartzearekin. Ba al dakizu webguneetako cookie-politika onartzearen aitzakian, zenbat enpresari ematen ari zaren zure datuak erabiltzeko baimena? Egizu froga. Sartu ohikoan bisitatzen duzun edozein webgunetan eta cookieak onartzeko adierazten dizun mezuan (pantailaren behekaldean agertu ohi da, eta ez bazaizu agertzen esan nahi du jada onartua daukazula) eta OK sakatu beharrean, sakatu aukera gehiago erakusteko botoia. Orain zerrendatu zenbat enpresa dauden muturra sartuta webgune batean eta bestean. Cookieak onartzea klik bakarrarekin oso erraz jartzen dute, baina ez onartzea askoz zailagoa da. ARGIAn ez dugu sekula halakorik egin, ezta egingo ere.

Herritarron pribatutasun eskubidea eta zehatzago esanda, gure komunitatea multinazionalen atzaparretatik babestea ARGIAren lehentasunetan dago. Horregatik, pribatutasunaren babesa informatiboki lantzeaz gain, neurri zehatzak hartzen jarraituko dugu.

Hau guztia egin dezakegu komunitate zabal batek ARGIAren proiektua babesten duelako. Oraindik ez baduzu pausoa eman, zintzoki animatzen zaitugu ARGIAkoa egitera, zuk erabakitzen duzun eta zure aukeren barnean dagoen ekarpen ekonomikoa eginez. Zenbat eta gehiago izan, orduan eta gauza gehiago egiteko aukera izango dugu, libre eta doan.

EGIN ARGIAKOA

Jarrai dezagun kazetaritza independentea egiten, jarrai dezagun txikitik eragiten.

Jaso besarkada bat ARGIA egiten dugun guztion partetik.